O‘zbekistonda mahalliy hokimliklar qabul qilayotgan aksar yopiq qarorlar qonunchilikka zid. Biroq ularga javobgarlik yo‘q. Bu haqda Korrupsiyaga qarshi kurashish agentligi direktori Akmal Burxonov “Lolazor” podkastidagi chiqishida maʼlum qildi.
Akmal Burxonovning aytishicha, 2023-yilda mahalliy hokimliklar tomonidan 115 mingta qaror qabul qilingan.
“Shundan 43 mingtasi yopiq bo‘lgan. Ular qonunchilikka zid. Qonunda faqatgina shaxs, vasiylik va xomiylikka doir maʼlumotlar yopiqligiga ruxsat berilgan. E-qaror nazorati Adliya vazirligida. Biz vazirlikdan yopiq qarorlarni olib, 194 tasini o‘rgandik. Qarabsizki, ichida shaxsga doir maʼlumot bo‘lmagan, aksincha bino qurishni moliyalashtirish, rag‘batlantirish bo‘yicha qarorlar yopiq tarzda qabul qilingan. Masalan, Laziz akaga oylikni ko‘p beryaptida, shaxsga doir deb, qarorni yopib qo‘yyapti. Qarorlarni shaxsga doir, degan niqob ostida yopiqlayapti”, dedi agentlik rasmiysi.
Akmal Burhonov mazkur muammoni hal etish bo‘yicha takliflar ilgari surilganini qo‘shimcha qildi.
“Biz Adliya vazirligi va boshqa idoralar bilan birga yopiq qarorlarni tartibga solish borasida rahbariyatga taklif kiritdik. Birinchidan, qarorlarni yopiq holda qabul qilish bo‘yicha aniq tartib ishlab chiqish nazarda tutildi. Ikkinchidan, qarorni yopiq qilishdan oldin Korrupsiyaga qarshi kurashish agentligi bilan kelishish majburiyatini yuklash taklifi berildi. Yaʼni biz: “to‘g‘ri, bu qaror haqiqatan ham yopiq ekan”, desak, hujjat keyin yopiq holga keltirilishi nazarda tutilmoqda. Hozir qarorlarni xohlagancha yopib tashlasa ham hech qanaqa javobgarlik yo‘q. Masalaga jiddiy kirishilgan. Bu rahbariyat darajasiga ko‘tarilgan masala va bizga topshiriq bo‘lgan. Takiflararimiz yaqin kunlarda davlat rahbari tomonidan qo‘llab–quvvatlansa, qonunchilikka o‘zgartirish kiritilib, o‘zgarish bo‘ladi. Tasavvur qiling, qarorlarning 30 foizdan ko‘pi yopiq. Bu byudjet pulini xohlagancha sarflashadi degani”, – deya taʼkidladi masʼul.
Avvalroq O‘zbekistonda 2023-yili korrupsiyada sudlangan 566 nafar davlat xizmatchisi qayta ishga kirib, yana shu jinoyatni sodir etgani xabar qilingandi.
Izoh (0)