Parijda 4—18-oktyabr kunlari bo‘lib o‘tgan YUNESKO Ijroiya kengashining 217-sessiyasida O‘zbekiston tashabbusi “Xalqaro axborotdan erkin foydalanish kuni munosabati bilan Toshkent deklaratsiyasi” rezolyutsiyasi bir ovozdan maʼqullandi, deb xabar bermoqda “Dunyo” AA.
Toshkent deklaratsiyasi 2022-yil 28—29-sentyabr kunlari YUNESKO bilan birgalikda Xalqaro axborotdan erkin foydalanish kuni munosabati bilan Toshkentda o‘tkazilgan “Sunʼiy intellekt, elektron boshqaruv va axborot erkinligi” mavzusidagi xalqaro konferensiya yakunlari bo‘yicha qabul qilingan. Xalqaro axborotdan erkin foydalanish kuni 2019-yilda eʼlon qilinganidan beri birinchi marta global darajada nishonlanmoqda. BMT Bosh Assambleyasi tomonidan 28-sentyabr Xalqaro axborotdan erkin foydalanish kuni sifatida nishonlanadi.
Rezolyutsiya loyihasi aʼzo davlatlar tomonidan Ijroiya kengashining 217-sessiyasi kun tartibiga yangi masala sifatida kiritilgan asosiy hujjatlardan biri bo‘ldi. Hujjatga 20 ta davlat, jumladan, Andorra, Jazoir, Ozarbayjon, Qozog‘iston, Qirg‘iziston, Tojikiston, Kuvayt, Misr, Marokash, Suriya, Sudan, Tunis, Falastin, Palau, Shri-Lanka, Vengriya, Livan, Liberiya, Zimbabve va Chili hammuallif bo‘ldi.
Rezolyutsiyada O‘zbekiston hukumatiga Xalqaro axborotdan erkin foydalanish kuni munosabati bilan Toshkent shahrida (2022-yil 28—29-sentyabr) bir qator tadbirlar tashkil etgani uchun minnatdorlik bildirilgan. Hujjat, shuningdek, bosh direktorni Toshkent deklaratsiyasida belgilangan inson huquqlari va barqaror rivojlanishni rag‘batlantirish uchun axborotdan foydalanishga yordam beradigan faoliyatni qo‘llab-quvvatlashga chaqiradi.
Hujjatga muvofiq, “Axborotdan erkin foydalanish bo‘yicha Toshkent deklaratsiyasi”ni tasdiqlash bo‘yicha Bosh konferensiyaning 42-sessiyasi (shu yil 7-22-noyabr, Parij sh.) kun tartibiga kiritish to‘g‘risida qaror qabul qilindi.
Ijroiya kengash rezolyutsiyasi YUNESKO Bosh konferensiyasi tomonidan ham qo‘llab-quvvatlangan holda (umumiy maʼqullash) qabul qilinishi kutilmoqda.
Izoh (0)