Германия ҳукумати келаётган қиш фаслида Украинани энергия билан таъминлаш учун қўшимча 70 миллион евродан ортиқ маблағ ажратади. Бу ҳақда Германия Иқтисодий ҳамкорлик ва ривожланиш вазирлиги хабарида айтилган.
“Қўшимча маблағлар ҳисобига Германия блокли иссиқлик электр станциялари, қозонхоналар, генераторлар ва қуёш электр станцияларини Украина шаҳарлари ва шаҳар ҳокимиятларига тақдим этади”, дейилади вазирлик хабарида.
Аввалроқ Украина президенти Владимир Зеленский мамлакат мудофаа бюджетини 500 миллиард гривнага (тахминан 12 млрд доллар) ошириш ҳақидаги қонунни имзолагани ҳақида хабар берилганди.
“Украинанинг ҳарбий бюджети 3,73 триллион гривнани ташкил этади, бу Россия томонидан бошланган кенг кўламли урушдан аввал тасдиқланган бюджетдан 2,3 баравар кўпдир”, деди Олий Рада депутати Ярослав Железняк.
Шунингдек, 20 сентябрь куни Еврокомиссия раҳбари Урсула фон дер Ляйеннинг Киевга ташрифи давомида Украинанинг вайрон бўлган энергетика инфратузилмасини тиклашга 100 миллион евро ажратилиши маълум қилинганди.
Изоҳ (0)