Farg‘ona viloyati Marg‘ilon shahrida 37 kilogrammdan ziyod giyohvand modda saqlab kelgan shaxs ushlandi. Bu haqda viloyat IIB axborot xizmati xabar berdi.
Qayd etilishicha, 29-iyun kuni Farg‘ona viloyati IIB hamda Marg‘ilon shahar IIB tezkor xodimlari tomonidan “Qoradori-2024” tadbiri o‘tkazilgan. Tadbirda “Tuyagum” MFYda yashovchi 53 yoshli A.K.ning yashash xonadoni xolislar ishtirokida ko‘zdan kechirilgan. Tekshiruv davomida u xonadonidagi ekin maydonida 13 tup marixuana giyohvand o‘simligini parvarishlab kelayotgani aniqlangan.
Shuningdek, A.K. 10 dona uch litrli idishda 12 kilogramm 537 gramm ko‘knori boshoqlarini, 2 dona uch litrli idishda 2 kilogramm 570 gramm marixuana moddasini, oq polietilen paketda esa 41 gramm gashish giyohvandlik moddasini hamda oq polietilen qopda 22 kilogramm 550 gramm ko‘knori somonini saqlab kelayotgani aniqlanib, tegishli tartibda hujjatlar rasmiylashtirilgan.
Jami olingan giyohvand moddalar miqdori 37 kilogrammdan ziyodni tashkil qilgan. Hozirda mazkur holat yuzasidan tergovga qadar tekshiruv harakatlari olib borilmoqda.
Avvalroq Farg‘onada 17 yoshli bola yashayotgan uydan 30 kilodan ortiq narkotik moddalar topilgani to‘g‘risida xabar berilgandi. Shuningdek, Samarqandda fuqaroning uyidan salkam 32 kilo marixuana topilgan, Qirg‘izistonda O‘zbekistonga giyohvand moddalar tashish bilan shug‘ullangan shaxs qo‘lga olingan edi.
Izoh (0)