“Adolat” partiyasi ehtiyojmand aholini ishga qabul qilganlik uchun soliq imtiyozlarini belgilash tashabbusi bilan chiqdi

So‘nggi uch yil ichida mamlakatimizda ko‘makka muhtoj 3 mln aholining turmush sharoiti yaxshilangani holda kambag‘allik darajasini 17 foizdan 11 foizga tushirishga erishildi. Shuningdek, mamlakatimizda ehtiyojmand aholini qo‘llab-quvvatlash bo‘yicha boshlangan islohotlarni izchil davom ettirish va kelgusi uch yilda kambag‘allik darajasini
7 foizgacha pasaytirish maqsadini to‘la amalga oshirish yo‘lida taʼsirchan chora-tadbirlar hayotga tatbiq etilmoqda.

Shu jihatdan, “Adolat” sotsial-demokratik partiyasi tomonidan ilgari surilgan ehtiyojmand aholini ishga qabul qilganlik uchun soliq imtiyozlarini belgilash tashabbusi ham yuqoridagi maqsadli islohotlarning amaliy natijasiga xizmat qilishi aniq.

Xorijiy tajribaga eʼtibor qaratadigan bo‘lsak, Xitoyda kam taʼminlangan oila farzandlari, bolasi bor yolg‘iz ayollar va boquvchisiz keksa fuqarolarni ish bilan taʼminlagan korxona va tashkilotlarga qator soliq imtiyozlari berilgani ayon bo‘ladi. Masalan, nogironligi bo‘lgan fuqarolarni ish bilan taʼminlagan ishbilarmonlik subyektlariga davlat tomonidan mol-mulk va yer solig‘i uchun 50 foizdan 100 foizgacha imtiyozlar beriladi.

Partiyaning ehtiyojmand aholini ishga qabul qilganlik uchun soliq imtiyozlarini belgilash tashabbusi tadbirkorlik subyektlarini ham kambag‘allikni qisqartirishga qaratilgan chora-tadbirlarga faol jalb etishga xizmat qiladi. Bu esa aholi farovonligining oshishiga hamda milliy iqtisodiyotimiz rivojiga munosib hissa bo‘lib qo‘shiladi.