Hindistonda maymunchechakning yangi shtammi (Mpox clade 1) bilan kasallanishning birinchi holati aniqlandi. Bu haqda Asian News International agentligi rasmiy manbalarga tayanib xabar berdi.
“O‘tgan hafta Kerala shtatining Malappuram shahrida maymunchechak kasalligining сlade 1 shtammi aniqlandi. Bemor Birlashgan Arab Amirliklaridan kelgan 38 yoshli erkak ekani ma’lum qilingan”, deyiladi agentlik xabarida.
Bemorda yuqori isitma va turli toshmalar yuzaga kelgan. Shifokorlar tegishli namunalarni tahlil qilish uchun laboratoriyaga yuborgan.
Rasmiy maʼlumotlarga ko‘ra, bu Hindistonda maymunchechak kasalligining сlade 1 shtammi aniqlanishining birinchi holatidir. Agentlikning eslatishicha, xuddi shu shtamm tufayli JST Afrikada favqulodda holat e’lon qilgandi.
Iyul oyida butun dunyo bo‘ylab 1425 nafar insonda maymunchechak kasalligi aniqlangan bo‘lib, ularning olti nafarida o‘lim qayd etilgan. Kasalliklarning yarmidan ko‘pi (55 foiz) Afrika, (24 foiz) Amerika, (11 foiz) Yevropa va (1 foiz) Janubi-Sharqiy Osiyoda uchraydi.
Izoh (0)