Rossiya O‘zbekistonga maymunchechakni aniqlash uchun “Vektor” ilmiy markazi tomonidan ishlab chiqarilgan test tizimlari to‘plamlarini yuboradi. Bu haqda “Rospotrebnadzor” matbuot xizmati xabar berdi.
26-avgust kuni Rossiya bosh davlat sanitariya vrachi Anna Popova raisligida Yevrosiyo iqtisodiy ittifoqiga a’zo davlatlar aholisining sanitariya-epidemiologiya farovonligi sohasidagi vakolatli organlar rahbarlari kengashining navbatdan tashqari yig‘ilishi bo‘lib o‘tdi.
Unda Armaniston, Belarus, Qozog‘iston va Qirg‘iziston bosh davlat sanitariya shifokorlari ishtirok etgan. Shuningdek, Tojikiston va O‘zbekistonning sanitariya-epidemiologiya osoyishtaligi sohasidagi vakolatli organlari rahbarlari taklif etilgan.
Uchrashuvda maymunchechak kasalligi bo‘yicha JSSTning xalqaro ahamiyatga molik favqulodda holat e’lon qilinishi bilan bog‘liq vaziyat muhokama etilgan. Kengash a’zolarining fikricha, YeOII davlatlari, shuningdek, Tojikiston va O‘zbekistonda maymunchechakning tarqalish xavfi past deb baholanmoqda.
Yevrosiyo mintaqasining barcha mamlakatlari chegarada sanitariya va karantin nazorati choralarini kuchaytirdi.
Hamkorlar Rossiyadan maymunchechakni aniqlash uchun test tizimlarini taqdim etishni so‘ragan.
“Test tizimlarining dastlabki to‘plamlari shu hafta O‘zbekistonga yetkaziladi”, deyiladi xabarda.
JSST avgust oyining o‘rtalarida maymunchechak epidemiyasi bilan bog‘liq favqulodda holat eʼlon qilgandi. Bunga Afrika qitʼasining ayrim hududlarida maymun chechagi bilan bog‘liq vaziyat nazoratdan chiqib ketgani sabab bo‘lgan.
O‘zbekistonda maymunchechak kasalligi chetdan kirib kelishi va uning oldini olish maqsadida ma’lum chora-tadbirlar amalga oshirilmoqda. Xususan, sanitariya-karantin xizmati tomonidan aeroportlarda havo harorati yuqori bo‘lgan yo‘lovchilarni masofadan turib aniqlaydigan teplovizorlar o‘rnatiladi.
Sanepidqo‘mita boshlig‘i o‘rinbosari Nurmat Otabekov O‘zbekistonga maymunchechak kirib kelishi ehtimoli mavjudligi, lekin tarqalish xavfi juda pastligini aytgandi. Qo‘mita bergan ma’lumotga ko‘ra, O‘zbekiston aholisining aksariyat qismida maymunchechakka qarshi jamoaviy immunitet mavjud.
Izoh (0)