Trampga suiqasd qilgan shaxs 20 yilgacha qamalishi mumkin — OAV

Respublikachilar partiyasidan prezidentlikka nomzod Donald Trampga suiqasd uyushtirishda gumon qilingan Rayan Uesli Rut ikki modda bo‘yicha 20 yilgacha qamoq jazosiga hukm qilinishi mumkin. Bu haqda Associated Press sud hujjatiga tayanib xabar berdi.

Unga ko‘ra, Rut o‘qotar qurol saqlaganlikda ayblanib, 15 yillik qamoq va 250 ming dollar jarimaga, shuningdek, uning qurolidagi seriya raqami o‘chirilgani uchun yana besh yillik qamoq jazosi va 250 ming dollar jarimaga tortilishi mumkin.

Suiqasd tafsilotlari

Kecha, 15-sentyabr kuni Donald Tramp golf o‘ynayotgan klub yonida otishmalar sodir bo‘ldi. Tramp otishma sodir bo‘lgan joydan bir necha yuz metr narida bo‘lgan.

Prezidentlar va sobiq prezidentlarni qo‘riqlash bilan shug‘ullanadigan Maxfiy xizmat xodimi butalar orasidan chiqib qolgan qurol stvolini payqab, hamkasblari bilan birga darhol o‘sha tomonga o‘t ochgan.

Shundan so‘ng gumonlanuvchi butalar orasidan chiqib, qora Nissan’ga o‘tirib, qochib ketgan. Politsiya uni Martin okrugiga olib boradigan katta yo‘lda qo‘lga olgan.

Mahalliy politsiya boshlig‘ining aytishicha, maxfiy xizmat agentlarining o‘qlari gumonlanuvchiga tegmagan. Butalar orasidan optik mo‘ljallagichli AK-47 rusumli avtomat, ikkita ryukzak va GoPro videokamerasi aniqlangan.

Gumonlanuvchi Rayan Uesli Rut aslida kim?

Rasmiylar Trampga suiqasd qilishda gumonlanayotgan shaxs 58 yoshli Rayan Uesli Rut ekanini xabar qildi.

Gumonlanuvchi tez-tez siyosatchilarni, jumladan, Tramp va Baydenni tanqid qilgan. Rutning LinkedIn’dagi profilida u Shimoliy Karolina qishloq xo‘jaligi va texnika fanlari universitetida o‘qigani, 2018-yilda Havayiga ko‘chib o‘tgani aytiladi.

Tramp suiqasdga qanday munosabat bildirdi?

Donald Trampning shtabi voqeadan so‘ng sobiq prezidentning bayonotini e’lon qildi.

“Yaqin atrofimda o‘q ovozlari eshitildi, ammo mish-mishlar tarqalishidan oldin shuni eshitishingizni xohlayman: men sog‘ va salomatman! Meni hech narsa to‘xtata olmaydi. Hech qachon taslim bo‘lmayman! Meni qo‘llab-quvvatlaganingiz uchun sizni doimo sevib qolaman”, deb yozgan Tramp.