“Rossiyaning Ukrainadagi g‘alabasi Yevropa tarixini o‘zgartiradi” — Yevrokomissiya rahbari

Yevrokomissiya rahbari Ursula fon der Lyayen Rossiyaning g‘alabasi Yevropadagi tarix yo‘nalishini o‘zgartirishini va Yevropa Ittifoqi bundan keyin aslo oldingidek bo‘lmasligini maʼlum qildi. Bu haqda “TASS” nashri maʼlum qildi.

Yevropa komissiyasi rahbari Ursula fon der Lyayen Strasburgdagi parlament sessiyasida ushbu bayonotni eʼlon qilgan. U yana bir bor Yevropa Ittifoqi davlatlarini Ukrainani qurol bilan taʼminlash uchun birlashishga chaqirgan. Rossiyani Yevropa uchun “ekzistensial tahdid” deb atagan.

Fon der Lyayenga ko‘ra, Rossiyaning g‘alabasi “nafaqat xaritani o‘zgartiradi, balki Yevropa tarixi yo‘nalishiga ham taʼsir etadi”. Ittifoq endi oldingi kabi yagona va mustahkam bo‘lmaydi.

Fon der Lyayen Ukraina Yevropa Ittifoqi manfaati uchun “og‘ir yuk”ni o‘z yelkasiga olganini aytgan. Shuning uchun ham Yevropa Ittifoqiga aʼzo davlatlar Ukrainani o‘zini himoya qilish vositalar bilan taʼminlashi kerak.

“Ukraina g‘alaba qozonishi kerak. Uning g‘alabasi bizning birligimizdir”, — degan Yevrokomissiya rahbari.

Rossiya G‘arbning Ukraina uchun qurol-yarog‘ yetkazib berishi va ukrain qo‘shinlarini tayyorlashga yordam berishi faqatgina mojaroni uzaytirishini va jang maydonidagi vaziyatni o‘zgartirmasligini bir necha bor taʼkidlagan.