Durov farzandlarining onasi Telegram aktivlarining yarmini da’vo qilmoqda

Telegram asoschisi Pavel Durov farzandlarining onasi Irina Bolgar Telegram asoschisiga qo‘yiladigan yangi talablarni ma’lum qildi.

U messenjerni Durov bilan birgalikda erishilgan mulk deb hisoblagan hamda unga bo‘lgan huquqlarning yarmini sud orqali olish niyatini ma’lum qilgan. Bolgarning so‘zlariga ko‘ra, ularning Durov bilan ro‘yxatdan o‘tmagan munosabatlari 10 yil davom etgan, bu davrda uchta bola tug‘ilgan.

Ayolning qo‘shimcha qilishicha, u tadbirkorning mol-mulkidan foydalanish huquqiga ega bo‘lgan, ammo foydalanish shartnomalari, ayolning fikricha, “uning huquqlarini to‘liq himoya qilmagan”.

“Nikohimiz rasmiy ro‘yxatga olinmagani va birgalikda erishilgan mulk, jumladan, asosiy aktiv – Telegram messenjeri faqat uning nomiga ro‘yxatga olingan bo‘lishiga qaramay, farzandlarim hamda men har doim oilaviy resurslardan foydalanish imkoniyatiga ega bo‘lishimizga chin dildan ishonardim”, deydi Bolgar.

Uning qo‘shimcha qilishicha, Durov bolalarning moliyaviy xavfsizligini kafolatlashga, ular uchun mablag‘ ajratishga hamda ularga qimmat uy sotib olishga va’da bergan.

“Aksar mamlakatlarda de-fakto nikoh rasmiy deb tan olinadi, boshqalarida siz fuqarolik qonunchiligiga muvofiq birgalikda sotib olingan mulkning ulushini talab qilishingiz mumkin”, deya ta’kidlagan Bolgar.