O‘zbekistonning Buyuk Britaniyadagi elchisi Ravshan Usmonov London City meri Maykl Maynelli bilan uchrashdi. Bu haqda “Dunyo” agentligi xabar berdi.
Qayd etilishicha, Britaniya tomoni O‘zbekistonda iqtisodiyotni isloh qilish borasida tashqi savdo, soliq va moliya siyosatini liberallashtirish, tadbirkorlikni qo‘llab-quvvatlash hamda taʼlim tizimini modernizatsiya qilish sohasida olib borilayotgan keng ko‘lamli ishlarni yuqori baholagan.
Respublikaning London fond birjasi bilan yo‘lga qo‘yilgan yaqin hamkorligini qo‘llab-quvvatlaymiz. Shuningdek, 21-may kuni ushbu platforma orqali O‘zbekistonning umumiy qiymati qariyb 1,5 milliard dollarga teng navbatdagi suveren xalqaro obligatsiyalarining jahon moliya bozorlarida joylashtirilganini olqishlaymiz. Bundan tashqari, biz Britaniya va O‘zbekiston o‘rtasidagi hududlararo hamkorlikni rivojlantirishdan manfaatdormiz, — degan Maykl Maynelli.
Uchrashuv yakunida Toshkent shahri va London City o‘rtasida hamkorlik aloqalarini o‘rnatish va delegatsiyalar almashinuvini faollashtirish, London City’da O‘zbekistonning investitsiyaviy, turizm va madaniy salohiyatiga bag‘ishlangan tadbirlarni birgalikda tashkil etish bo‘yicha kelishuvlarga erishilgan.
London City London shahri tarkibiga kiradi va mahalliy hududdagi hukumat xizmatlari uchun masʼul bo‘lgan qolgan 32 ta tumanlar bilan birgalikda faoliyat yuritadi. U o‘zining mahalliy boshqaruv va qonunchilik organlari hamda politsiya xizmatiga ega.
U 1673-yilda birinchi bank bo‘linmasining tashkil etilishi va 1694-yilda Angliya bankiga asos solinishi bilan dunyoning birinchi moliyaviy markaziga aylangan. Hozirda London City yevroobligatsiyalar savdosi, valyuta ayirboshlash, fyuchers kontraktlari va jahon sug‘urtasi bo‘yicha tan olingan yetakchi hisoblanadi.
2022-yilda jahon bozoridagi kunlik valyuta operatsiyalarining (7,5 trillion dollar) 38 foizdan ortig‘i (2,85 trillion dollar) Londonda amalga oshirilgan. Hozirgi kunda ham global valyuta operatsiyalarini nazorat qiladi va dunyoda oltin narxlarini belgilashda asosiy rol o‘ynaydi.
London City’da London fond birjasi, Angliya banki va Lloyd sug‘urta kompaniyasi, shuningdek, 500 taga yaqin xorijiy bank va moliya institutlari joylashgan bo‘lib, ularda 615 mingdan ortiq odam ishlaydi.
Avvalroq Ravshan Usmonov Buyuk Britaniya va Shimoliy Irlandiya birlashgan qirolligi qiroli Charlz III ga ishonch yorliqlarini topshirgani to‘g‘risida xabar berilgandi.
Izoh (0)