Isroil bosh vaziri Binyamin Netanyaxu Isroil va Falastinning HAMAS harakati hali ham garovga olinganlar bo‘yicha kelishuvdan yiroq ekanidan afsus bildirdi. Avvalroq Oq uy kelishuv 90 foizga hal bo‘lgan, deb xabar bergandi.
“Isroil tomonidan yon berish garovga olinganlarni o‘ldirish uchun litsenziya bo‘lardi... Biz Isroilga emas, HAMASga bosim o‘tkazishda davom etishimiz kerak”, dedi Netanyaxu Fox News telekanaliga bergan intervyusida.
Netanyaxu shu haftada ikkita yirik matbuot anjumani o‘tkazib, G‘azo sektori bo‘yicha HAMAS bilan olib borilgan muzokaralar haqida gapirib o‘tgandi.
G‘azo sektorida garovga olingan olti kishining o‘ldirilishi Isroil jamiyatida qattiq g‘azabga sabab bo‘ldi, natijada minglab fuqarolar ishtirokida hukumatga qarshi norozilik namoyishlari yuzaga keldi.
G‘azo bo‘yicha vositachilar orqali muzokaralar bir necha haftadan beri Qohira va Dohada olib borilmoqda. Isroil maʼlumotlariga ko‘ra, Falastinning HAMAS harakati tomonidan asirga olingan 101 kishi hamon tutqunlikda, ular orasida vafot etganlar ham bor.
Turli amaliyotlar va sa’y-harakatlar davomida 154 kishi HAMAS asirligidan ozod etilgani xabar qilindi.
Izoh (0)