“Yangi O‘zbekiston” bog‘ida o‘tkazilayotgan mustaqillikning 33 yilligiga bag‘ishlangan bayram shodiyonasida prezident aholini munosib ish o‘rinlari bilan ta’minlash masalasiga to‘xtaldi.
Prezident matbuot xizmatining xabar berishicha, jahon savdo tashkilotiga a’zo bo‘lish yo‘lidagi sa’y-harakatlari qat’iy davom ettirilishi ta’kidlandi. Alohida kompaniyalarga berilgan monopol huquq va imtiyozlar bosqichma-bosqich bekor qilinib, barchaga teng huquqlar berilishi ta’minlanadi.
Joriy yilda energetika, neft-gaz, suv xo‘jaligi, yo‘l qurilishi, temir yo‘l va ayeroport xizmati sohalarida 17 turdagi davlat monopoliyasini tugatish to‘g‘risida qaror qabul qilindi. Bu ishlar davom ettirilib, mamlakatimiz xalqaro savdo makonining ajralmas qismiga albatta aylantirilishi qayd etildi.
Ta’kidlanishicha, yana bir dolzarb masala – aholini munosib ish o‘rinlari bilan ta’minlashdir.
“Biz bu borada tadbirkorlarimizga tayanamiz. Shu bois, ularni qo‘llab-quvvatlashni yanada kengaytiramiz.
Zamonning o‘zi tadbirkorlarimizdan keng miqyosda fikrlab ish yuritishni, jahon bozorlarida raqobatdosh mahsulot yaratishni talab etmoqda. Bu yo‘lda ularga omad va yutuqlar tilaymiz”, — dedi davlat rahbari.
Shuningdek, bayram shodiyonasida Yangi O‘zbekistonni barpo etishda asosiy e’tibor qaratilayotgan 5 ta yo‘nalish aytildi. Bular: sifatli ta’lim tizimini yo‘lga qo‘yish, biznesni rivojlantirish, korrupsiyadan xoli, adolatli sud tizimini yaratish, sog‘liqni saqlash sohasini tubdan yaxshilash, ekologik barqarorlikni ta’minlash.
Bundan tashqari, tadbirda davlat rahbari O‘zbekistonning barcha yoshlariga murojaat qildi.
“Qadrli o‘g‘il-qizlarim, mamlakatimiz istiqboli, barcha ezgu niyatlarimiz ijobatini biz avvalo sizlarning timsolingizda ko‘ramiz.
Kelajakda turli sohalarda ulkan yutuq va zafarlarga erishib, yurtimizni dunyoga yanada keng tarannum etishingizni istaymiz.
Marrani baland oling, siz buyuk ishlarga qodirsiz!
Hamisha o‘z kuchingiz, qat’iyat va salohiyatingizga ishoning!
Davlatimiz, xalqimiz, Prezident sizlarni bu yo‘lda doimo qo‘llab-quvvatlaydi, har qanday yordamni ayamaydi”, — deydi Shavkat Mirziyoyev.
Izoh (0)