“Янги Ўзбекистон” боғида ўтказилаётган мустақилликнинг 33 йиллигига бағишланган байрам шодиёнасида президент аҳолини муносиб иш ўринлари билан таъминлаш масаласига тўхталди.
Президент матбуот хизматининг хабар беришича, жаҳон савдо ташкилотига аъзо бўлиш йўлидаги саъй-ҳаракатлари қатъий давом эттирилиши таъкидланди. Алоҳида компанияларга берилган монопол ҳуқуқ ва имтиёзлар босқичма-босқич бекор қилиниб, барчага тенг ҳуқуқлар берилиши таъминланади.
Жорий йилда энергетика, нефть-газ, сув хўжалиги, йўл қурилиши, темир йўл ва аеропорт хизмати соҳаларида 17 турдаги давлат монополиясини тугатиш тўғрисида қарор қабул қилинди. Бу ишлар давом эттирилиб, мамлакатимиз халқаро савдо маконининг ажралмас қисмига албатта айлантирилиши қайд этилди.
Таъкидланишича, яна бир долзарб масала – аҳолини муносиб иш ўринлари билан таъминлашдир.
“Биз бу борада тадбиркорларимизга таянамиз. Шу боис, уларни қўллаб-қувватлашни янада кенгайтирамиз.
Замоннинг ўзи тадбиркорларимиздан кенг миқёсда фикрлаб иш юритишни, жаҳон бозорларида рақобатдош маҳсулот яратишни талаб этмоқда. Бу йўлда уларга омад ва ютуқлар тилаймиз”, — деди давлат раҳбари.
Шунингдек, байрам шодиёнасида Янги Ўзбекистонни барпо этишда асосий эътибор қаратилаётган 5 та йўналиш айтилди. Булар: сифатли таълим тизимини йўлга қўйиш, бизнесни ривожлантириш, коррупциядан холи, адолатли суд тизимини яратиш, соғлиқни сақлаш соҳасини тубдан яхшилаш, экологик барқарорликни таъминлаш.
Бундан ташқари, тадбирда давлат раҳбари Ўзбекистоннинг барча ёшларига мурожаат қилди.
“Қадрли ўғил-қизларим, мамлакатимиз истиқболи, барча эзгу ниятларимиз ижобатини биз аввало сизларнинг тимсолингизда кўрамиз.
Келажакда турли соҳаларда улкан ютуқ ва зафарларга эришиб, юртимизни дунёга янада кенг тараннум этишингизни истаймиз.
Маррани баланд олинг, сиз буюк ишларга қодирсиз!
Ҳамиша ўз кучингиз, қатъият ва салоҳиятингизга ишонинг!
Давлатимиз, халқимиз, Президент сизларни бу йўлда доимо қўллаб-қувватлайди, ҳар қандай ёрдамни аямайди”, — дейди Шавкат Мирзиёев.
Изоҳ (0)