Namanganda O‘zbekistondagi eng katta musiqali favvoralardan biri foydalanishga topshirildi (video)

Namanganda O‘zbekistondagi eng katta musiqali favvoralardan biri foydalanishga topshirildi. Bu haqda “Daryo” muxbiri Azizbek Abduvaliyev xabar bermoqda.

Mustaqillik bayrami arafasida Yangi Namangan shaharchasidagi “Yangi O‘zbekiston” bog‘ida barpo etilgan favvoraning diametri 160 metr bo‘lib, balandligi 12 metrga teng.

Jami 380 ta favvorachadan iborat majmuada har kuni kechki payt jahon va milliy musiqa sanʼatiga mansub turli kompozitsiyalar ijro etilmoqda.

Mazkur bog‘ direktori Rasuljon Ismoilovning aytishicha, jami 58 gektar maydonga ega hududda musiqali favvoradan tashqari “Vatanparvar” bog‘i, sunʼiy ko‘l, veloyo‘lak, sport maydonchalari, bolalar o‘yingohlari ham bosqichma-bosqich ishga tushiriladi.

Shuningdek, 10 ming tup ko‘chat ekilib, 2 gektar mevali bog‘ ham barpo etiladi.

“Yangi O‘zbekiston” bog‘idagi 2,5 ming kishini sig‘diradigan amfiteatrda esa ilk bor Mustaqillik bayrami tantanalari bo‘lib o‘tdi.

Namangandagi musiqali favvora hozirgi kunda mahalliy aholi va gullar shahri mehmonlari uchun eng maqbul manzilga aylanib bormoqda.