Наманганда Ўзбекистондаги энг катта мусиқали фавворалардан бири фойдаланишга топширилди (видео)

Наманганда Ўзбекистондаги энг катта мусиқали фавворалардан бири фойдаланишга топширилди. Бу ҳақда “Дарё” мухбири Азизбек Абдувалиев хабар бермоқда.

Мустақиллик байрами арафасида Янги Наманган шаҳарчасидаги “Янги Ўзбекистон” боғида барпо этилган фавворанинг диаметри 160 метр бўлиб, баландлиги 12 метрга тенг.

Жами 380 та фавворачадан иборат мажмуада ҳар куни кечки пайт жаҳон ва миллий мусиқа санъатига мансуб турли композициялар ижро этилмоқда.

Мазкур боғ директори Расулжон Исмоиловнинг айтишича, жами 58 гектар майдонга эга ҳудудда мусиқали фавворадан ташқари “Ватанпарвар” боғи, сунъий кўл, велойўлак, спорт майдончалари, болалар ўйингоҳлари ҳам босқичма-босқич ишга туширилади.

Шунингдек, 10 минг туп кўчат экилиб, 2 гектар мевали боғ ҳам барпо этилади.

“Янги Ўзбекистон” боғидаги 2,5 минг кишини сиғдирадиган амфитеатрда эса илк бор Мустақиллик байрами тантаналари бўлиб ўтди.

Намангандаги мусиқали фаввора ҳозирги кунда маҳаллий аҳоли ва гуллар шаҳри меҳмонлари учун энг мақбул манзилга айланиб бормоқда.