Иссиқлик электр станциялари қишки мавсумга тайёрми?

Иссиқлик электр станциялари ва иссиқлик марказларини қишки мавсумга тайёрлаш, энергообъектларнинг барқарор фаолиятини таъминлаш, импорт ўрнини босувчи маҳсулотларни маҳаллий шароитларда ишлаб чиқаришни жорий этишга оид йирик лойиҳалар амалга оширилмоқда. Бу ҳақида Энергетика вазирлиги хабар берди.

Жорий куз-қиш мавсумига тайёргарлик доирасида “Ўзбекэнерготаъмир” АЖ иссиқлик электр станцияларидаги 53 та энергоқурилмани мавсумга ҳозирлаш мақсадида мукаммал, ўрта ва жорий таъмирлаш ишларини босқичма-босқич олиб бормоқда.

 

Жумладан, мамлакатимиз энергетика тизимида йирик электр станциялар ҳисобланувчи Тошкент ва Навоий иссиқлик электр станцияларида ҳам бу борада йирик лойиҳалар амалга оширилмоқда.

Бу ерда замонавий энергоқурилмалар қаторида анъанавий энергоблокларни модернизация қилиш, уларни рақамлаштириш ва ишлаб чиқаришда ёқилғи сарфини камайтириш бўйича ишлар якунига етказилди.

Тошкент иссиқлик электр станциясининг 9-сон энергоблокида мукаммал таъмирлаш ишлари якунланди. Хусусан, таъмир ишлари давомида энергоблокнинг қозон қурилмаси, турбинанинг юқори ва паст босим роторлари ишчи кураклари, генератор ҳамда трансформаторларида ишлар олиб борилди.

Ушбу ишларни сифатли ва ўз муддатида амалга ошириш мақсадида 200 нафарга яқин малакали мутахассис жалб этилди. Ремонт кампаниясининг самарали ташкил этилиши натижасида ушбу энергоблокнинг ишлаб чиқариш қуввати 140 МВтдан 150 МВтга етказилди.

Тизимнинг рақамлаштирилиши орқали ёқилғи сарфи камайишига, натижада маҳсулот таннархи пасайишига эришилди. Бу эса йилига 458,6 минг куб метр табиий газ иқтисод қилиниши имконини беради. Атмосфера ҳавосига ифлослантирувчи моддаларнинг ташламалари миқдори 108,4 тоннага камайтирилади.

Навоий иссиқлик электр станциясида эса 3-сонли энергоблокда мукаммал таъмирлаш ишлари амалга оширилди.

Таъмирлаш даврида қозон ва турбина агрегатларида техник чора-тадбирлар амалга оширилди. Ушбу ишларга жами 300 нафар ишчи-ходим жалб этилди. Таъмирлаш ишларини бажариш натижасида қурилмаларнинг техник иқтисодий кўрсаткичлари яхшиланиб, ишончли ишлаш даражаси оширилди.

“Хусусан, ўрнатилган қуввати 150 МВт бўлган 3-энергоблок таъмирланиши натижасида йил якунига қадар 5 млн куб метр табиий газ иқтисод қилинади.

Энергетика тармоғининг асосий генерация қувватлари бўлган иссиқлик электр станцияларида модернизация, таъмирлаш ва эксплуатация ишлари давом этмоқда”, дейилади хабарда.