Isroil milliy xavfsizlik vaziri Itamar Ben-Gvir G‘azo sektoridagi urush vaqtinchalik gumanitar pauzadan keyin davom etmasa, iste’foga chiqishini ma’lum qildi.
O‘ta o‘ng siyosatchining so‘zlariga ko‘ra, bu holda “uning hukumatda qiladigan hech qanday ishi qolmaydi”. U mamlakat bosh vaziri Benyamin Netanyaxuning urushni davom ettirishga va’da bergan bayonotini eslatdi.
Avvalroq Ben-Gvir o‘zining X ijtimoiy tarmog‘idagi akkauntida (sobiq Twitter) Isroil va HAMAS o‘rtasida mahbuslar almashinuvini nazarda tutuvchi kelishuvni tanqid qilgan edi.
22-noyabr kuni Isroil rahbariyati HAMAS bilan asirlarni almashish haqidagi kelishuvni qabul qildi. Kelishuv to‘rt kunlik o‘t ochishni to‘xtatish va Isroil qamoqxonalaridagi 150 nafar falastinlik mahbusni ozod qilish evaziga 50 nafar garovga olingan isroilliklarni qo‘yib yuborishni o‘z ichiga oladi.
Kelishuv dastlab payshanba kuni ertalab kuchga kirishi kerak edi. Biroq keyin Isroil G‘azo sektorida sulh boshlanishi va HAMAS bilan garovga olinganlarni almashishni juma kuniga qoldirdi.
Izoh (0)