AQSHning Sent-Luis shahrida shaxmat bo‘yicha nufuzli Sinquefield Cup turniri bo‘lib o‘tdi.
Musobaqada jahonning 10 nafar kuchli grossmeysterlari bosh sovrin uchun bahslarga kirishdi. Ular orasida o‘zbekistonlik Nodirbek Abdusattorov (2762) ham bor.
Turnirning so‘nggi 9-turida Nodirbek oq donalarda musobaqaning ikkinchi raqamli shaxmatchisi, FIDE bayrog‘i ostida qatnashgan rossiyalik Yan Nepomnyashiyga qarshi bahs olib bordi va g‘alabaga erishdi.
Shunday qilib Abdusattorov 2 g‘alaba, 6 durang va 1 mag‘lubiyat bilan turnir jadvalida qo‘shimcha ko‘rsatkichlarga ko‘ra 3-o‘rinni egalladi. Undan keyingi o‘rindagi Maksim Vashe-Lagrav (Fransiya, 2721) ham musobaqani 5 ochko bilan yakunladi. Fransuz grossmeysteri 9-turda amaldagi jahon chempioni Din Lijen (Xitoy, 2745)ga imkoniyat qoldirmadi.
Turnirning birinchi raqamli ishtirokchisi Fabiano Karuana oq donalarda Anish Giri (Niderlandiya, 2746)ni mag‘lubiyatga uchratdi. Yakunda sportchining ochkolari 5,5 taga yetdi va u musobaqani 2-o‘rin bilan yakunladi.
Bosh sovrinni Alireza Firuzja (Fransiya, 2751) qo‘lga kiritdi. Grossmeyster so‘nggi turda oq donalarda Rameshbabu Pragnanandxa (Hindiston, 2749) bilan durang qayd etdi. Bu durang unga 6 ochko bilan turnir chempioni bo‘lish uchun kifoya qildi.
Firuzja 0,5 1-o‘rin bilan birga 100 ming AQSH dollari pul mukofotiga ham ega bo‘ldi.
Nodirbek Abdusattorov esa turnirda 40 ming AQSH dollari miqdoridagi pul mukofotini ham qo‘lga kiritdi.
Bonuslar bilan qo‘shib hisoblaganda umumiy summa 70 ming AQSH dollaridan ko‘proqni tashkil qiladi.
Ma’lumot uchun, Nodirbek Abdusattorov yangilangan FIDE reytingida 7-o‘rinni egallab turibdi.
Izoh (0)