BAA poytaxti Abu-Dabi shahrida shaxmat bo‘yicha nufuzli turnir bo‘lib o‘tdi.
Mukofot jamg‘armasi 63 600 AQSH dollarini tashkil etuvchi Abu Dhabi Chess Festival 2024 turnirining Masters guruhida 11 nafar o‘zbekistonlik shaxmatchilar ham o‘z imkoniyatini sinovdan o‘tkazdi. Kecha, 23-avgust kuni o‘tkazilgan 8-turdan so‘ng musobaqa jadvalida Nodirbek Yakubboyev (2665) va Shamsiddin Vohidov (2643) 6,5 ochko bilan yetakchilikni egallab turgan edi.
8-turda Nodirbek Yakubboyev oq donalarda braziliyalik Luis Paolo Supi (2571)ni mag‘lubiyatga uchratdi. Vohidov esa ketma-ket beshta g‘alabadan keyin ochko yo‘qotdi. Shamsiddin oq donalarda hindistonlik Raunak Sadhvani (2653) bilan durang o‘ynadi.
Bugungi hal qiluvchi bahslarda Nodirbek Yakubboyev Hindiston vakili Leon Lyuk Mendonka bilan durang o‘ynadi, Shamsiddin Vohidov ham David Paravyan bilan durang qayd etdi.
Shu tariqa 9 turdan keyin 6 shaxmatchi bir xil—7 ochkodan to‘pladi. Qo‘shimcha koeffitsiyentlar evaziga Nodirbek Yakubboyev musobaqa chempionligini, Shamsiddin Vohidov esa 3-o‘rinni qo‘lga kiritdi.
Nodirbek Yakubboyev musobaqa g‘olibligi bilan bir qatorda 30 ming AQSH dollariga, Shamsiddin Vohidov esa 8000 AQSH dollariga ega chiqdi.
Izoh (0)