Pokiston bo‘ylab so‘nggi uch kun ichida kuchli yomg‘ir va yashin urishi oqibatida kamida 50 kishi halok bo‘ldi. Rasmiylar ayrim hududlarda favqulodda holat e’lon qilgan. Bu haqda Al Jazeera xabar berdi.
Ma’lum qilinishicha, bug‘doy o‘rayotgan dehqonlar yashin urishi oqibatida halok bo‘lgan. Yomg‘ir oqibatida shimoli-g‘arbiy va sharqiy Panjob provinsiyasida o‘nlab uylar qulab tushgan. Panjobda 21 kishi halok bo‘lgan, Afg‘oniston bilan chegaradosh shimoli-g‘arbiy Xayber-Paxtunxvada esa qurbonlar soni 21 kishini tashkil etadi. Islomobodda ham kuchli yomg‘ir yog‘gan va janubi-g‘arbiy Balujiston viloyatida yetti kishi halok bo‘lgan.
Pokistonlik ekologiya bo‘yicha ekspert Rafay Alamning aytishicha, aprel oyida bunday kuchli yog‘ingarchilik kuzatilishi odatiy hol emas.
Ikki yil oldin Pokiston mart va aprel oylarida jazirama to‘lqinga duch kelgandi. Hozir esa yog‘ingarchilikka guvoh bo‘lmoqdamiz va buning barchasi iqlim o‘zgarishi bilan bog‘liq — dedi u.
2022-yilda yomg‘ir tufayli Pokistonning uchdan bir qismini suv bosgandi, 1739 kishi halok bo‘lgandi. Tabiiy ofat 30 milliard dollar zarar keltirgan.
Kuchli yomg‘ir va suv toshqinlari Fors ko‘rfazi mintaqasini ham qamrab oldi. Ummonda kamida 18 kishi halok bo‘ldi. Birlashgan Arab Amirliklarida esa barcha parvozlar to‘xtatildi. Bahrayn, Qatar va Saudiya Arabistonida ham kuchli yomg‘irlar kuzatilmoqda. Bundan tashqari qo‘shni Qozog‘istonda va Rossiyada ham suv toshqinlari kuzatilib, talafotlarni bartaraf etish ishlari olib borilmoqda. Afg‘onistonda yog‘ingarchilik oqibatida qurbonlari soni 66 kishiga yetgan.
Izoh (0)