O‘zbekistonda 27—29-avgust kunlari 60 dan ortiq mamlakatlardan kelgan mutaxassislar kambag‘allik muammosining murakkab jihatlarini muhokama qilish uchun yig‘iladi, deb xabar bermoqda “Dunyo” axborot agentligi.
Ma’lum qilinishicha, O‘zbekistonda kambag‘allik muammosining jiddiyligi va uni hal etishda erishilgan yutuqlardan kelib chiqib, 27—28-avgust kunlari Toshkentda va 29-avgust kuni Samarqandda Ko‘p o‘lchovli kambag‘allik masalalari bo‘yicha xalqaro hamkorlik tarmog‘ining 9 yillik yuqori darajadagi anjumanini o‘tkazish to‘g‘risida qaror qabul qilingani bejiz emas.
Yuqori darajadagi tadbirda jahon yetakchilari, siyosatchi va iqtisodchilar, yetakchi olim va mutaxassislar ishtirok etadi. Tadbir Iqtisodiy tadqiqotlar va islohotlar markazi (CERR) tomonidan BMTTD va Oksford kambag‘allikka qarshi kurashish va inson kapitalini rivojlantirish tashabbusi (OPHI) ishtirokida tashkil etildi.
O‘zbekiston kambag‘allikka qarshi kurashning muhim masalalarini muhokama qilish uchun dunyoning yetakchi ekspertlari va yetakchilarini birlashtiradigan maydonga aylanadi. Muhokamalar global miqyosda kambag‘allikka qarshi kurash strategiyalarini takomillashtirish bo‘yicha tajriba va natijalarni almashishga qaratilgan.
Shavkat Mirziyoyev 14-avgust kuni kambag‘allikni qisqartirish va ijtimoiy himoya tizimini takomillashtirish chora-tadbirlariga oid taqdimot bilan tanishgandi. Taqdimotda O‘zbekistonda kambag‘allik darajasi 17 foizdan 11 foizga tushgani ma’lum qilindi. Kelgusi uch yilda kambag‘allik darajasini 11 foizdan 7 foizga qisqartirish maqsad qilingan.
Izoh (0)