BMTning bosib olingan Falastin hududlarida gumanitar ishlarni muvofiqlashtirish boshqarmasi ma’lumotlariga ko‘ra, Isroil avgust oyi boshidan beri G‘azo sektoridagi 125 ta gumanitar missiyaga kirishiga yo‘l qo‘ymagan.
Boshqarma maʼlumotlariga ko‘ra, G‘azo shimolida 147 ta gumanitar missiya rejalashtirilgan, biroq Isroil ulardan 46 tasini rad etgan, anklav janubiga kelgan 278 ta missiyadan 79 tasi kiritilmagan.
Avvalroq BMT bosh kotibi Antoniu Guterrishning Xavfsizlik kengashining Yaqin Sharq bo‘yicha yig‘ilishiga tayyorlangan bayonotida aytilishicha, G‘azoda yarim millionga yaqin aholi oziq-ovqat taqchilligiga duch kelmoqda.
Matnda, shuningdek, anklavga yoqilg‘i yetkazib berishdagi uzilishlar suv, gigiyena vositalari va sog‘liqni saqlash xizmatlaridan foydalanish imkoniyatini keskin kamaytirgani ma’lum qilingan edi.
“Mojaro tomonlari bu muammolarni hal qilish uchun zudlik bilan o‘z xatti-harakatlarini tubdan o‘zgartirishi kerak”, degan edi u.
U, shuningdek, tomonlar zudlik bilan kelishuv tuzishi kerakligini aytib, G‘azodagi gumanitar inqiroz “barcha uchun o‘chmas dog‘” ekanini ta’kidlagan.
Izoh (0)