Asin Tottumkal Bollivudda 100 kror rupiya to‘plagan ilk hind filmi “Gajini” da debyut qiladi. Salmon Xon bilan birga o‘ynagan “Doim tayyorman!” kartinasi chiqqanidan keyin esa uni “omad tumori” deb atashadi.
Ammo Bollivuddagi debyutidan oldin Asin 7 yil davomida Janubiy Hindiston kinosida muvaffaqiyatli rol o‘ynagan, u kinoga 15 yoshida, maktab o‘quvchisi bo‘lgan paytidayoq kirib kelgan. Asin Tottumkal 1985-yil 26-oktyabrda Kerala shtatining Kochi shahrida tug‘ilgan. Otasi Jozef — sobiq Markaziy razvedka boshqarmasi xodimi, onasi Selin — jarroh bo‘lgan.
Qizcha katolik oiladan bo‘lib, urf-odatga ko‘ra, uni otasi tomonidan buvisining sharafiga Mariya deb atashlari kerak edi. Biroq otasi qiziga “toza va begunoh” degan ma’noni anglatuvchi Asin ismini qo‘yadi.
Keyinchalik aktrisa o‘z intervyusida shunday deydi:
“Men ismimga mos bo‘lishga harakat qilaman. O‘zim ham Asin ismini hech qachon eshitmaganman. Bu ismni bilmagan odam meni erkak kishi deb o‘ylaydi. Ba’zan gazetalarda meni janob Asin deb atashadi. Bu juda kulgili. “A” harfi aslida sanskritcha “-siz” inkor qo‘shimchasini, “Sin” esa inglizcha “gunoh” ma’nosini bildiradi, ya’ni “begunoh qiz”.
O‘ninchi sinfgacha Asin Harbiy dengiz davlat maktabida o‘qigan, keyin Muqaddas Tereza maktabiga o‘tgan. 14 yoshida unga reklamada rol o‘ynashni taklif qilishadi va bu karyerasining boshlanishiga turtki bo‘ladi. Uning birinchi filmi rejissyor Satyana Antikkadning “Jayakantan — Narendran o‘g‘li” nomli malayalam filmida suratga tushganida Asin atigi 15 yoshda edi.
U o‘sha paytda davlat ishida ishlayman deb o‘ylab, shunchaki ermak uchun suratga tushgandi. Uning aytishicha, filmlarda suratga tushishni “o‘qishdan tashqari to‘garak” deb hisoblagan.
Maktabni tugatib olish uchun biroz tanaffus qilib, 2003-yilda Asin Ravi Teji bilan telugu tilidagi “Ona, ota va tamillik qiz” melodramasida debyut qiladi. Film blokbasterga aylanadi va bir yil o‘tgach, tamil tilida “Mahallakshmi o‘g‘li M. Kumaran” nomi bilan qayta suratga olinadi.
Asin mazkur filmda ham bosh rolni o‘ynaydi, bu safar Jayam Ravi bilan. Remeyk originalidan kam bo‘lmagan zavq bilan kutib olinadi. U ham blokbasterga aylanadi va 2004-yilning eng daromadli tamil filmlaridan biriga bo‘ladi.
Shunday qilib, Asin bir vaqtning o‘zida Janubiy Hindiston kinosining yulduziga aylanadi. U aktyorlik maktabida o‘qimagan, hamma narsani rejissyorlar va filmdagi partnyorlaridan o‘rgangan. Qiz o‘zining eng bebaho tajribasi sifatida “O‘nta avatar” fantastik jangari filmidagi pahlavon Kamol Hasan bilan suratga tushganini aytadi. Bir vaqtning o‘zida 10 ta rol o‘ynagan Kamol Hasan va xalqaro ijodkorlar jamoasi unga ijroning ko‘plab nozik tomonlarini o‘rgatadi.
Asin faqat eng mashhur yulduzlar bilan o‘ynardi: Rajnikant bilan “To‘qnashuv”, Vijay bilan “Sivakasi”, “Tamillik firibgar” va “Tansoqchi”, Pavan Kalyan bilan “Annavarama”, Ajit bilan “Yulduzi yulduziga to‘g‘ri kelmaganlar”, Vikrom bilan “Maya”, Suriya bilan “Vele” va “Gajini”. Shuning uchun uni hatto bir vaqtlar asosiy super yulduzlar shon-shuhratidan foydalanishda ayblashgan.
Ammo bu uning o‘z ishini yaxshi bajarishiga va uchta Filmfare mukofoti hamda Kerala shtati hukumatining ko‘ngilochar yo‘nalishdagi yutuqlari va muvaffaqiyatlari uchun mukofoti sovrindori bo‘lishiga to‘sqinlik qilmaydi.
Asin o‘zining tamil tilidagi blokbasteri “Gajini”ning remeyki bilan Bollivudga qadam qo‘yadi. Bu 2005-yil oxirida Amir Xonning mashhur qo‘ng‘irog‘idan oldin bir nechta taklifni rad etgan 23 yoshli qiz uchun Bollivuddagi orzular debyuti edi. Amir Xon qizdan hind tilida gapira olasanmi, deb so‘raydi. Asin “ha” deb javob beradi, natijada Kalpana roliga taklif qilinadi.
Undan keyin “London orzulari”, “Doim tayyorman!”, “To‘la uy 2”, “Aldoqchi”, “786-o‘yinchi”, “Hammasi yaxshi” kartinalarida suratga tushadi. Asin poliglot bo‘lib, 7 ta tilni biladi: ona tili malayalam, tamil, telugu, sanskrit, ingliz, hind va fransuz tillari. Shuningdek, u italyan, marathi, nemis va ispan tillarida ham gaplasha oladi.
Biroq shuncha muvaffaqiyatiga qaramay, ba’zi prodyuserlar Asinni yoqtirmaydi. Mahesh Bhatt intervyusida uni hech qachon filmida suratga olmasligini aytadi.
“Salmon va Amir Xon bilan birga rol o‘ynagani uning yaxshi aktrisa ekanligini anglatmaydi. Uning filmlari faqat super yulduzlar ishtirok etgani uchun hit bo‘ldi. Asinning o‘zi ham ahamiyatsiz rollarga ega va uning mahorati o‘rtacha. Mashhur bo‘lishi uchun u yaxshi yozilgan qahramonlarni tanlashi kerak”.
Ammo qiz mashhurlik cho‘qqisiga intilmadi. Hamkasbi Akshay Kumar uni biznesmen Rahul Sharma bilan tanishtirib qo‘yadi va Asin kinoni tashlab, turmushga chiqadi.
2017-yil 24-oktyabrda Asin va Rahul Arin ismli qizning ota-onasi bo‘ldi. Hozirda Asin oddiy oilaviy hayot kechirmoqda va baxtidan mamnun.
Izoh (0)