Асин Тоттумкал Болливудда 100 крор рупия тўплаган илк ҳинд фильми “Гажини” да дебют қилади. Салмон Хон билан бирга ўйнаган “Доим тайёрман!” картинаси чиққанидан кейин эса уни “омад тумори” деб аташади.
Аммо Болливуддаги дебютидан олдин Асин 7 йил давомида Жанубий Ҳиндистон киносида муваффақиятли рол ўйнаган, у кинога 15 ёшида, мактаб ўқувчиси бўлган пайтидаёқ кириб келган. Асин Тоттумкал 1985 йил 26 октябрда Керала штатининг Кочи шаҳрида туғилган. Отаси Жозеф — собиқ Марказий разведка бошқармаси ходими, онаси Селин — жарроҳ бўлган.
Қизча католик оиладан бўлиб, урф-одатга кўра, уни отаси томонидан бувисининг шарафига Мария деб аташлари керак эди. Бироқ отаси қизига “тоза ва бегуноҳ” деган маънони англатувчи Асин исмини қўяди.
Кейинчалик актриса ўз интервьюсида шундай дейди:
“Мен исмимга мос бўлишга ҳаракат қиламан. Ўзим ҳам Асин исмини ҳеч қачон эшитмаганман. Бу исмни билмаган одам мени эркак киши деб ўйлайди. Баъзан газеталарда мени жаноб Асин деб аташади. Бу жуда кулгили. “А” ҳарфи аслида санскритча “-сиз” инкор қўшимчасини, “Син” эса инглизча “гуноҳ” маъносини билдиради, яъни “бегуноҳ қиз”.
Ўнинчи синфгача Асин Ҳарбий денгиз давлат мактабида ўқиган, кейин Муқаддас Тереза мактабига ўтган. 14 ёшида унга рекламада рол ўйнашни таклиф қилишади ва бу карьерасининг бошланишига туртки бўлади. Унинг биринчи фильми режиссёр Сатяна Антиккаднинг “Жаякантан — Нарендран ўғли” номли малаялам фильмида суратга тушганида Асин атиги 15 ёшда эди.
У ўша пайтда давлат ишида ишлайман деб ўйлаб, шунчаки эрмак учун суратга тушганди. Унинг айтишича, фильмларда суратга тушишни “ўқишдан ташқари тўгарак” деб ҳисоблаган.
Мактабни тугатиб олиш учун бир оз танаффус қилиб, 2003 йилда Асин Рави Тежи билан телугу тилидаги “Она, ота ва тамиллик қиз” мелодрамасида дебют қилади. Фильм блокбастерга айланади ва бир йил ўтгач, тамил тилида “Маҳаллакшми ўғли М. Кумаран” номи билан қайта суратга олинади.
Асин мазкур фильмда ҳам бош ролни ўйнайди, бу сафар Жаям Рави билан. Ремейк оригиналидан кам бўлмаган завқ билан кутиб олинади. У ҳам блокбастерга айланади ва 2004 йилнинг энг даромадли тамил фильмларидан бирига бўлади.
Шундай қилиб, Асин бир вақтнинг ўзида Жанубий Ҳиндистон киносининг юлдузига айланади. У актёрлик мактабида ўқимаган, ҳамма нарсани режиссёрлар ва фильмдаги партнёрларидан ўрганган. Қиз ўзининг энг бебаҳо тажрибаси сифатида “Ўнта аватар” фантастик жангари фильмидаги паҳлавон Камол Ҳасан билан суратга тушганини айтади. Бир вақтнинг ўзида 10 та рол ўйнаган Камол Ҳасан ва халқаро ижодкорлар жамоаси унга ижронинг кўплаб нозик томонларини ўргатади.
Асин фақат энг машҳур юлдузлар билан ўйнарди: Ражникант билан “Тўқнашув”, Вижай билан “Сивакаси”, “Тамиллик фирибгар” ва “Тансоқчи”, Паван Калян билан “Аннаварама”, Ажит билан “Юлдузи юлдузига тўғри келмаганлар”, Викром билан “Майа”, Сурия билан “Веле” ва “Гажини”. Шунинг учун уни ҳатто бир вақтлар асосий супер юлдузлар шон-шуҳратидан фойдаланишда айблашган.
Аммо бу унинг ўз ишини яхши бажаришига ва учта Фильмфаре мукофоти ҳамда Керала штати ҳукуматининг кўнгилочар йўналишдаги ютуқлари ва муваффақиятлари учун мукофоти совриндори бўлишига тўсқинлик қилмайди.
Асин ўзининг тамил тилидаги блокбастери “Гажини”нинг ремейки билан Болливудга қадам қўяди. Бу 2005 йил охирида Амир Хоннинг машҳур қўнғироғидан олдин бир нечта таклифни рад этган 23 ёшли қиз учун Болливуддаги орзулар дебюти эди. Амир Хон қиздан ҳинд тилида гапира оласанми, деб сўрайди. Асин “ҳа” деб жавоб беради, натижада Калпана ролига таклиф қилинади.
Ундан кейин “Лондон орзулари”, “Доим тайёрман!”, “Тўла уй 2”, “Алдоқчи”, “786-ўйинчи”, “Ҳаммаси яхши” картиналарида суратга тушади. Асин полиглот бўлиб, 7 та тилни билади: она тили малаялам, тамил, телугу, санскрит, инглиз, ҳинд ва француз тиллари. Шунингдек, у италян, маратҳи, немис ва испан тилларида ҳам гаплаша олади.
Бироқ шунча муваффақиятига қарамай, баъзи продюсерлар Асинни ёқтирмайди. Маҳеш Бҳатт интервьюсида уни ҳеч қачон фильмида суратга олмаслигини айтади.
“Салмон ва Амир Хон билан бирга рол ўйнагани унинг яхши актриса эканлигини англатмайди. Унинг фильмлари фақат супер юлдузлар иштирок этгани учун ҳит бўлди. Асиннинг ўзи ҳам аҳамиятсиз ролларга эга ва унинг маҳорати ўртача. Машҳур бўлиши учун у яхши ёзилган қаҳрамонларни танлаши керак”.
Аммо қиз машҳурлик чўққисига интилмади. Ҳамкасби Акшай Кумар уни бизнесмен Раҳул Шарма билан таништириб қўяди ва Асин кинони ташлаб, турмушга чиқади.
2017 йил 24 октябрда Асин ва Раҳул Арин исмли қизнинг ота-онаси бўлди. Ҳозирда Асин оддий оилавий ҳаёт кечирмоқда ва бахтидан мамнун.
Изоҳ (0)