Raqobat qo‘mitasi “O‘ztemiryo‘lyo‘lovchi” AJ va “Shahar atrofida yo‘lovchi tashish” MCHJ tomonidan iste’molchilardan 1,3 milliard so‘mga yaqin ortiqcha undirilgan to‘lovlarni qaytarishi yuzasidan ko‘rsatma berib, moliyaviy jarima qo‘lladi.
Qo‘mita matbuot xizmatining xabar qilishicha, ularning faoliyati “Raqobat to‘g‘risida”gi hamda “Isteʼmolchilarning huquqlarini himoya qilish to‘g‘risida”gi qonun hujjatlariga asosan o‘rganib chiqildi.
O‘rganishlarda “O‘ztemiryo‘lyo‘lovchi” AJ Farg‘ona filiali (bo‘linmasi) tomonidan temiryo‘l vokzali (stansiyalari) bo‘ylab 2023-yil davomida 606 380 ta sotilgan chiptalardan vositachilik yig‘im qiymati bo‘yicha 660 million so‘mga yaqin, “Shahar atrofida yo‘lovchi tashish” MCHJ Farg‘ona filiali tomonidan temiryo‘l vokzali (stansiyalari) bo‘ylab 2024-yilning 1-yanvaridan 24-iyulgacha 185 806 ta sotilgan chiptalardan vositachilik yig‘im qiymati bo‘yicha 560 million so‘mga yaqin, umumiy hisobda jami 792 186 nafar isteʼmolchilardan 1,3 milliard so‘mga yaqin ortiqcha haq undirilgani aniqlandi.
Yuqoridagilarga asosan, Qo‘mita maxsus komissiyasi tomonidan “O‘ztemiryo‘lyo‘lovchi” AJga va “Shahar atrofida yo‘lovchi tashish” MCHJga shaharlararo va shahar atrofida yo‘lovchi tashish bo‘yicha Farg‘ona filiali tomonidan ortiqcha undirilgan to‘lovlarni isteʼmolchilarga qaytarishi yuzasidan ko‘rsatma berilib, moliyaviy jarima qo‘llanildi.
Shuningdek, qonunbuzilish holatlarini bartaraf etish va kelgusida yo‘l qo‘ymaslik yuzasidan bajarilishi majburiy bo‘lgan ko‘rsatmalar berildi.
Izoh (0)