Qirg‘iziston Milliy banki banklardan OFAC, Yevropa Ittifoqi va Buyuk Britaniyaning sanksiyalar ro‘yxatiga kiritilgan shaxslar bilan biznes aloqalarini to‘xtatishni talab qilmoqda. Bu haqda manbalarga tayanib, “Tazabek.kg” xabar berdi.
Gap Rossiyaning “Sberbank”, “MTS Bank” OAJ, “Tbank” AJ (Tinkoff) va NSPK milliy to‘lov tizimi operatori bilan aloqalarga taalluqli. Ya’ni, nazorat organi xalqaro sanksiyalar ostidagi mazkur banklar va tashkilotlar bilan bog‘liq har qanday operatsiyalarni to‘xtatishni so‘ragan.
Nazorat organi ikkilamchi sanksiyalar xavfini kamaytirish uchun shoshilinch choralar ko‘rishni talab qilmoqda. Qirg‘iziston Milliy banki banklardan mijozlar va kontragentlar ustidan nazoratni kuchaytirishni, ularning AQSH (OFAC), Yevropa Ittifoqi va Britaniyaning sanksiyalar ro‘yxatlarida mavjud emasligini sinchkovlik bilan tekshirishni, sanksiyalar ta’siriga tushishi mumkin bo‘lgan mijozlarning operatsiyalariga alohida e’tibor qaratishni so‘raydi.
Shuningdek, banklar mijozlarning barcha transchegaraviy operatsiyalarini pul yuvishga va terrorizmni moliyalashtirishga qarshi kurashish bo‘yicha qonunchilik talablariga hamda xalqaro sanksiyalarga muvofiqligi yuzasidan nazorat o‘rnatishi lozim bo‘ladi.
Izoh (0)