Qozog‘iston mudofaa vaziri Ruslan Jaksilikov geosiyosiy vaziyat, KXSHTga a’zolik va harbiy xizmatchilar maoshi haqida gapirdi. Bu haqda u Tengrinews’ga bergan intervyusida ma’lum qildi.
Vazirdan bugungi kunda dunyo ancha murakkab geosiyosiy vaziyatga duch kelgani, shu bois Qozog‘iston armiyasi qay darajada tayyor ekani so‘raldi.
“Geosiyosiy vaziyat masalasi juda murakkab. Lekin shuni ta’kidlashni istardimki, davlat rahbari, hukumatimiz va jamiyatimiz siyosati tufayli Qozog‘istonda qo‘shnilarimizning hech biri bilan muammo yo‘q. Qozog‘iston davlat chegaralari bo‘yicha hal etilmagan muammolarga ega bo‘lmagan dunyodagi yagona davlatdir.
Qozog‘istonning har qanday tahdid va xatarlarga har qanday holatda javob berishga tayyorligi uning mustaqil milliy zamonaviy armiyasi mavjudligi bilan ham izohlanadi. Chunki Qozog‘iston Qurolli kuchlari davlatchilikning asosiy institutlaridan biridir”, dedi u.
Biroq vazir armiya soni haqidagi savolga u “bugungi vaziyat uchun mos kelishi” bilan cheklandi. Jaksilikovdan Qozog‘istonning KXSHT va SHHTga a’zoligi qanday imkoniyatlar taqdim etishi so‘raldi.
“Birinchidan, Qozog‘iston tarixan KXSHT tarkibiga kiradi, bu tashkilot mustaqilligimizning boshida shu uyushma doirasida tinchlik va konstitutsiyaviy tartibni saqlash maqsadida tuzilgan. Keyinchalik Shanxay hamkorlik tashkiloti paydo bo‘ldi, unda harbiy blok ham mavjud. Bu bizga nima beradi? Bu ikki qudratli tashkilot hududlarimizdagi tinchlik va totuvlikni ta’minlashga intilib, davlatlarimiz ravnaqiga o‘z hissasini qo‘shmoqda. Bu biz uchun foydali, davlat rahbari bu vazifalarni yaxshi tushunadi. Biz bu ikki tashkilot doirasida hamkorlikni kengaytirmoqdamiz”, dedi u.
Shu bilan birga, Ruslan Jaksilikov harbiy xizmatchilar maoshi haqidagi savolga ham javob berdi.
“40 yildan ortiq xizmat qilyapman. Harbiy kishining farovonlik darajasi har doim, hatto sovet davrida ham yuqori bo‘lgan, deyish biroz noto‘g‘ri. Nima uchun? Chunki farovonlik darajasi har doim barcha zarur masalalarni: oila, bolalar, shaxsiy farovonlik, qandaydir jamg‘armalar va boshqalarni hal etishga imkon bergan. Albatta, biz hamma narsani: yaxshi uyni, yaxshi mashinani, bolalarni o‘qitish imkoniyatini, ularning keyingi rivojlanishini xohlaymiz. Lekin keling, davlatning iqtisodiy imkoniyatlaridan kelib chiqamiz. Davlat bizga berishi mumkin bo‘lgan narsani taqdim etadi”, dedi Jaksilikov.
Mudofaa vaziri 2023-yilda vazirlik uch toifadagi harbiy xizmatchilar: harbiy uchuvchilar, shifokorlar va pedagoglarning ish haqini oshirganini aytdi.
“Harbiy shaxs uchun, albatta, ish haqini oshirish muhim, lekin ijtimoiy imtiyozlarni tiklashga qaytish kerak, chunki ijtimoiy imtiyozlar ancha muhimroqdir. Elementar, ilgari harbiy xizmatchilarga kommunal xizmatlarning 50 foizi to‘lanardi. Albatta, 50 foizini bo‘lmasa-da, kamida 30-40 foizini qaytarish masalasi ko‘rib chiqilsa, xursand bo‘lamiz. Yiliga bir marta harbiy xizmatchilar va oila a’zolarining dam olish joyiga sayohati bepul. Bu unchalik katta muammo emas”, dedi u.
Shu bilan birga, vazir harbiylar uchun maosh oshib borayotgani va bu unvonga bog‘liqligini xulosa qildi.
Izoh (0)