Shavkat Mirziyoyev 19-avgust kuni Qoraqalpog‘iston Respublikasiga tashrifini sanoat salohiyati bilan tanishishdan boshladi.
Prezident matbuot xizmatining ma’lum qilishicha, Nukus Electroapparat qo‘shma korxonasi 2017-yilda ishga tushgan, unda elektr energiyasi tarmog‘i uchun kuchlanish qurilmalari ishlab chiqariladi. Joriy yil iyunda bu yerda 10 million dollardan ziyod mablag‘ evaziga quyosh panellarini yasash loyihasi ishga tushirildi. Uskunalar Janubiy Koreyadan keltirib o‘rnatildi. Ishlab chiqarish jarayoni 100 foiz avtomatlashtirilgan. Loyihaning yillik quvvati 273 ming dona.
Bu mamlakatda muqobil energetikadan foydalanish borasidagi ishlarda qo‘l keladi. Hozirgacha turli inshoot va xonadonlarda 600 megavatt quvvatli quyosh panellari o‘rnatilgan. Bu hali davom etadi.
Qo‘shma korxona ichki bozorda talab yuqori mahsulotni mahalliylashtirish bilan birga 4 million dollarlik eksport imkoniyatiga ham ega bo‘ldi. 70 kishi ish bilan ta’minlandi.
Davlatlar rahbari ish jarayonini ko‘zdan kechirdi, xodimlar bilan suhbatlashdi. Mutasaddilarga bunday korxonalarni ko‘paytirish, ularda bozor talabi yuqori mahsulotlar ishlab chiqarish bo‘yicha ko‘rsatmalar berildi.
Shu yerda tarmoq korxonalarida ishlab chiqarilayotgan mahsulotlar namoyish etildi.
Zavodning o‘zida ham 125 kilovatt quvvatli quyosh panellari o‘rnatilgan. Undan olingan elektr ichki ehtiyojlar uchun ishlatiladi, ortiqchasi hududiy elektr tarmog‘iga sotiladi.
So‘nggi yillarda O‘zbekistonda 2 milliard dollar investitsiya hisobiga quvvati 2,6 gigavatt bo‘lgan 10 ta quyosh va shamol stansiyalari ishga tushirildi. Shuningdek, umumiy qiymati 19 milliard dollar bo‘lgan 18,6 gigavattli 32 ta “yashil” loyiha bo‘yicha ish olib borilmoqda. Umuman, 2030-yilgacha energetika balansida qayta tiklanuvchi quvvatlar ulushini 40 foizga yetkazish maqsad qilingan.
Nukus Electroapparat qo‘shma korxonasidan lavhalar
-yt59a5KE.jpg)
-reNC-ad9.jpg)
O‘zbekiston prezidenti Qoraqalpog‘istonga tashrifi davomida sanoat korxonalaridan tashqari IT va ijtimoiy soha obyektlarini ko‘zdan kechirishi, mahallalarda aholi hayoti bilan tanishishi rejalashtirilgan. Yangi majmualar ishga tushirilib, navbatdagi loyihalar boshlanadi.
Shavkat Mirziyoyev hududlarning ijtimoiy-iqtisodiy rivoji bilan tanishish, xalq bilan muloqot qilish maqsadida Qoraqalpog‘iston Respublikasiga so‘nggi marta 2023-yilning mart oyida borgandi. Tashrif davomida yangi korxonalar ishga tushirilib, respublikada sanoatni rivojlantirish yo‘nalishlari belgilandi. Davlat rahbari, shuningdek, yoshlar bilan muloqot qildi, mahallalardagi ishlarni ko‘zdan kechirdi hamda madaniy tadbirda ishtirok etdi.
Izoh (0)