O‘zbekistonda 2024-yil 1-sentyabrdan fermer, dehqon xo‘jaliklari hamda boshqa mahsulot yetishtiruvchilarga sholi yetishtirish va xarid qilish xarajatlarini moliyalashtirish uchun prezident qarorida belgilangan shartlarda imtiyozli kreditlar ajratiladi.
![](/static/2024/08/19/photo_2024-08-19_12-42-51-tRlrahKH.jpg)
Bu haqda “Sholi yetishtiruvchilar faoliyatini qo‘llab-quvvatlashning qo‘shimcha chora-tadbirlari to‘g‘risida”gi prezident qarorida belgilandi.
Qarorga ko‘ra, 2025—2026-yillarda sholi ekish uchun xarid qilingan va ishlab chiqarilganiga bir yildan oshmagan yangi urug‘ seyalkalari hamda ko‘chatlab ekish uskunalari qiymatining 20 foizi davlat byudjetidan subsidiyalar ajratish orqali qoplab beriladi.
Xorazm viloyatida sholi yetishtiruvchilarga quyidagi qo‘shimcha subsidiyalar ajratiladi:
- sholi yetishtirish uchun har bir gektar lazerli tekislangan maydonga sarflangan yoqilg‘i-moylash materiallari xarajatlarining 100 foizini, biroq bir gektar uchun umumiy xarajat miqdorining 1 million so‘mdan ortiq bo‘lmagan qismini qoplash uchun;
- prezident qarorida belgilangan miqdorlarda zamonaviy suv tejovchi texnologiyalarni joriy qilish bilan bog‘liq xarajatlarning bir qismini qoplash uchun.
2024-yil hosilidan, istisno tariqasida, Xorazm viloyatidagi 120 sentner va undan yuqori hosil olgan qishloq xo‘jaligi korxonalariga yetishtirilgan sholining 50 foizdan oshmagan guruch mahsulotini eksportga yo‘naltirishga ruxsat beriladi.
Hujjatda, shuningdek, Qishloq xo‘jaligi vazirligi hamda Xorazm viloyati hokimligiga Janubiy Koreyaning KOPIA markazi bilan hamkorlikda Gurlan tumanida sholi elita urug‘chilik markazlari tashkil etish topshirilgan.
Sholichilik ilmiy-tadqiqot instituti bilan hamkorlikda urug‘chilik markazlarida yuqori avlodli urug‘likni ko‘paytirish yo‘lga qo‘yiladi.
Izoh (0)