Prezident Qoraqalpog‘istonda xotin-qizlarni ish bilan ta’minlaydigan korxonalarni ko‘paytirishni topshirdi

Hududlar rivoji va aholi hayoti bilan tanishish maqsadida 30-mart kuni Qoraqalpog‘istonga borgan Shavkat Mirziyoyev tashrifni Kegeyli tumanidagi “Aqtuba tekstil” korxonasidan boshladi.

Prezident matbuot xizmatining xabar qilishicha, ilgari bu tumanda sanoat umuman yo‘q edi. Iqtisodiyotni tarkibiy o‘zgartirish bo‘yicha qilinayotgan ishlar, hududlararo hamkorlik natijalari bu yerda ham sezilmoqda. Xususan, andijonlik tadbirkorlar bilan birgalikda uchta loyiha ishga tushirildi.

Ulardan biri — “Aqtuba tekstil” yiliga 3 million donadan ziyod trikotaj mahsulotlari ishlab chiqarish quvvatiga ega. Buning uchun Germaniya, Yaponiya va Turkiyadan zamonaviy uskunalar keltirib o‘rnatilgan. 500 ta ish o‘rni yaratilgan. Yiliga 6 million dollarlik mahsulot eksport qilish rejalashtirilgan.

Davlat rahbari korxonadagi ish jarayonini ko‘zdan kechirdi, ishchi ayollar bilan suhbatlashdi. Chekka hududlarda bunday yangi korxonalar ochilayotgani, xotin-qizlar ish bilan ta’minlanayotganining ahamiyatini ta’kidlab, buni davom ettirish bo‘yicha mutasaddilarga ko‘rsatmalar berdi.

Xabarda ta’kidlanishicha, korxonaning o‘zida kasb-hunarga qayta tayyorlash o‘quv markazi tashkil etilgan. Unda yaqin mahallalardagi ishsiz fuqarolar hunar o‘rganib, o‘z yo‘lini topadi.