“Do‘stlar” seriali orqali tanish bo‘lgan amerikalik aktyor Mettyu Perrining o‘limi bo‘yicha beshta gumondor, jumladan, marhumning shaxsiy yordamchisi Kennet Ivamasu va ikki shifokorga nisbatan ayblov e’lon qilindi, deb yozmoqda “Pravila jizni”.
54 yoshli Perrining o‘lim sababi baxtsiz hodisa deb atalgan edi. U 2023-yil 28-oktyabr kuni Los Anjelesdagi uyining vannaxonasida o‘lik holda topilgan. Aktyorning jasadida qotillik alomatlari bo‘lmagan edi. O‘lim sababi sifatida “ketamin moddasining nojo‘ya ta’siri” va “cho‘kish” kabi omillar keltirilgan edi.
Aniqlanishicha, aktyor vafot etgan kunda ertalab u Ivamasudan bir nechta ketamin inyeksiyasini olgan. Aktyor depressiyani davolash uchun ketamin qabul qilar, ammo kun sayin dori dozasini oshirib borardi. Mutaxassislar unga buyurgan dozadan ortig‘i o‘limga olib kelishini aytib ogohlantirgan edi.
Ammo Perri ko‘proq inyeksiya qabul qilishni istadi va shaxsiy shifokoridan rad javobini eshitgach, qo‘shimcha dori qabul qilish uchun boshqa shifokorlarga murojaat qildi.
AQSH prokurori Martin Estradaning so‘zlariga ko‘ra, ikki shifokor Perrining ketaminga qaramligidan foydalanib, aktyor hayotining so‘nggi oylarida unga dori vositasini “o‘ta xavfli dozalarda” sotgan.
“Shifokorlar qilayotgan ishlari noto‘g‘ri ekanini bilishardi. Ularning xatti-harakatlari janob Perrining hayotini katta xavf ostiga qo‘yishini tushunishardi. Lekin ular baribir aktyorga ketaminni sotishdi va shu orqali vaziyatdan foydalanishdi”, dedi prokuror.
Huquq-tartibot idoralari xodimlari shifokorlarning shaxsiy yozishmalaridan iqtibos keltirgan, ulardan biri chatda: “Qiziq, bu ahmoq keyingi safar qancha to‘lar ekan” va “Keling, bilib olamiz” deb yozilgan.
Mettyu Perri o‘limidan ikki oy avval shifokorlarga taxminan 55 ming dollar to‘lagan. Ular 12 dollarga sotib olgan bir flakon ketamin uchun aktyor ikki ming dollar berar edi.
Politsiya mazkur ish bo‘yicha ikki kishini: giyohvand moddalar savdosi bilan shug‘ullanuvchi va “ketamin malikasi” deb nom olgan Jasvin Sangha va shifokor Salvador Plasensioni hibsga oldi. Shifokorga aktyorning o‘limidan so‘ng ketamin tarqatish bo‘yicha yettita ayblov va tibbiy hujjatlarni soxtalashtirish bo‘yicha ikkita ayblov qo‘yildi. Ular esa bo‘lib o‘tgan ishlarni tan olmadi.
ABC News nashri ma’lumotlariga ko‘ra, Mark Chaves ismli yana bir shifokor va Erik Fleming ismli narkotik savdosi bilan shug‘ullangan shaxslar ham hibsga olingan va ular o‘z aybini tan olgan.
Izoh (0)