Madridning “Real” klubi hujumchisi Kilian Mbappe “Malyorka”ga qarshi Ispaniya chempionatining 1-tur uchrashuvidagi durangdan so‘ng ijtimoiy tarmoqdagi sahifasida o‘yin haqida fikr bildirdi.
“Yaxshi natija emas. Keyingi o‘yinlarga bor e’tiborimizni qaratamiz va ehtiyotkor bo‘lamiz”, deb yozdi fransiyalik hujumchi Kilian Mbappe.
Ushbu bahs Mbappe uchun Ispaniya chempionatidagi debyut o‘yin bo‘ldi. Bungacha forvard UEFA Superkubogi uchrashuvida “Atalanta”ga qarshi maydonga tushib gol urgan edi.
Avvalroq OAVda fransiyalik hujumchining maoshi yiliga 30 million yevro va urilgan gollar uchun bonuslar bo‘lishi haqida ma’lumotlar paydo bo‘lgan edi.
Palma-de-Malyorkadagi “Malyorka Son Moix” stadionida bo‘lib o‘tgan uchrashuv 1:1 hisobida yakunlandi. Madridliklar safida Rodrigo gol muallifiga aylandi.
Izoh (0)