Qashqadaryo viloyatining Qarshi tumanidagi Charog‘il qishlog‘ida Nilufar Yusupova ismli ayol mahalladagi Sunnat ismli hokim yordamchisi bilan til biriktirib, bir nechta fuqarolarni aldab, ularning nomiga kredit olib, katta miqdordagi mablag‘ni “yeb ketgani” aytilmoqda.
Jabrlanuvchilar bu haqda “Daryo”ga shikoyat qilib, qanday aldanganliklari xususida so‘zlab berdi.
![](/static/2024/08/18/photo_2024-08-18_23-11-39-4VUyZM8l.jpg)
Nilufar Yusupova menga uyingiz hujjatlarini to‘g‘irlab beraman deb, hujjatlarimni oldi. Biroz muddatdan keyin qilgan ishi uchun 6 million so‘m miqdorda pul so‘radi. Lekin sharoitim yaxshi bo‘lmagani uchun berolmadim. O‘sha paytlar otamning sog‘lig'ida muammosi borligi tufayli vafot etdi. Shu bois uy hujjatlarimni ham ma’lum muddat tekshirolmadim. Bir-ikki oydan keyin esa uyim boshqa bir insonga sotilganini bildim, mening uy sotilishida mutlaqo xabarim yo‘q, deydi murojaatchi ayollardan biri Shahnoza Aliyeva.
Yana bir fuqaro Zoya Alimovaning aytishicha, Nilufar ismli ayol hokim yordamchisi bilan bir bo‘lib, uning nomiga kredit olib “yeb ketgan”.
Oilaviy sharoitim og‘ir bo‘lgani uchun kredit olmoqchi edim. Hokim yordamchisi Sunnat va Nilufar Yusupova yordam berishlarini aytib, kredit olib berishmoqchi bo‘lishdi. Dastlab hali ish bitmayapti deb yurishdi. Keyinchalik bilsam, nomimga kredit olib, o‘zlari yeb ketishgan ekan. Ular menga kredit chiqarib berishlari evaziga 2 million so‘m ham talab qilishgandi. Plastik kartochkamni olib, mana bir necha oyki, hali ham qaytarishgani yo‘q. Holat yuzasidan tegishli joylarga murojaat qildim, lekin muammo hali ham o‘z yechimini topmadi, deydi u.
Navbatdagi murojaatchi Fotima Farmonovaning bildirishicha, Nilufar Yusupova hamda Sunnat ismli hokim yordamchisi unga kam chiqqan nafaqa pulining qolganini olib kelib berish bahonasida fuqarolik pasportini olgan. Ko‘p o‘tmay uning nomiga kredit olingani ma’lum bo‘lgan.
![](/static/2024/08/18/photo_2024-08-18_23-11-38-8EkP6_fS.jpg)
Men 500 ming so‘m miqdorida nafaqa puli olib kelardim. 2-3 oydan keyin nafaqa pulim 175 ming so‘m kam chiqdi. Bu muammoning sababini bilish uchun bankka bormoqchi edim. Ammo Nilufar Yusupova “pulni bankdan o‘zim olib kelaman, xatolik bo‘libdi, qolgani naqd qilib berilar ekan”, dedi. Ikkinchi oyda 250 ming so‘m kam pul tushdi. Men tuman pensiya jamg‘armasiga murojaat qilganimda ular sizning nomingizga kredit chiqarilgan deyishdi, deydi aldanib qolganini aytgan ayol.
Jabrlanuvchining bildirishicha, nomiga kredit olinganligidan mutlaqo bexabar bo‘lgan. U hech qanday hujjatga qo‘l qo‘ymaganini, hattoki bankka ham bormaganini aytmoqda. Fuqaro nomiga kredit olinganini bank xodimlari kredit to‘lanishi masalasida bezovta qila boshlagach, bilgan.
Navbatdagi fuqaro Dilafro‘z Qobilova ham aldanganini, hokim yordamchisi va Nilufar Yusupova ismli ayolning hiylasiga chuv tushganini aytmoqda.
Aldangan ayolning aytishicha, Nilufar Yusupova pulga muhtojligini aytib, ukasini Koreyaga jo‘natmoqchiligini, shu sabab uning nomiga kredit chiqarishda yordam so‘ragan. Jabrlanuvchi ayol dastlab bunga rozi bo‘lmagan. Nilufar Yusupova ayolni ishontirish uchun uy hujjatlarini olib kelib bergan.
Menning nomimga 50 million so‘m miqdorida, turmush o‘rtog‘im nomiga esa 33 million so‘m miqdorda kredit oldik. 2024-yilning iyun-iyul oyidan boshlab bank xodimlari meni bezovta qila boshlashdi. Kreditingizning to‘lov muddati o‘tib ketgan, agar to‘lamasangiz Damas rusumli avtomashinangizni musodara qilamiz deyishdi. Lekin men ushbu avtomobilni 107 million so‘mga olganman. Buning kreditga hech qanday aloqasi yo‘q. Men aldanib qoldim, deydi jabrlanuvchi.
Bildirilishicha, ayni kunda hokim yordamchisi va ayolning xatti-harakatlari yuzasidan tergov jarayonlari ketmoqda.
Izoh (0)