“Daryo”da “Qashqadaryolik 80 yoshli ayol sud va MIB o‘rtasida sarson bo‘lmoqda. Fuqaroga noqonuniy jarima yozilgan” sarlavhali maqola e’lon qilingandi. Qashqadaryo viloyat sudlari axborot xizmati bunga munosabat bildirib, sudning mazkur buyrug‘i bekor qilinganini ma’lum qildi.
Fuqarolik ishlari bo‘yicha Shahrisabz tumanlararo sudiga undiruvchi Savdo-sanoat palatasi da’vo ariza bilan murojaat qilib, Qashqadaryo viloyat hududiy boshqarmasining “Yangiobod texxizmat BST” MCHJ manfaatida qarzdor Gulchehra Jabbarovadan qarzdorlikni undirishni so‘ragan.
Fuqarolik protsessual kodeksining 170-moddasi talabiga ko‘ra sud buyrug‘i nizosiz talablar bo‘yicha sud muhokamasi o‘tkazmasdan berilgan sud hujjatidir. Shuningdek, ushbu kodeksning 181-moddasida “Qarzdor arz qilingan talabga qarshi e’tirozlarini buyruqni bergan sudga sud buyrug‘ining ko‘chirma nusxasini olgan kundan e’tiboran o‘n kunlik muddatda yuborishga haqli”, deb ko‘rsatilgan.
Undiruvchining arizasi fuqarolik ishlari bo‘yicha Shahrisabz tumanlararo sudi tomonidan 2024-yil 10-may kuni qanoatlantirilgan va sud buyrug‘i chiqarilgan. Qarzdorlikni undirish haqidagi ijro varaqasi 2024-yil 19-iyun kuni Majburiy ijro byurosining Qarshi shahar bo‘limiga yuborilgan, deyiladi mas’ullar izohida.
Ta’kidlanishicha, fuqarolik ishlari bo‘yicha Shahrisabz tumanlararo sudining 80 yoshli ayolni sarson qilgan buyrug‘i 2024-yil 7-may kuni chiqqan.
Fuqaroning 2024-yil 15-avgustda bergan e’tirozi ko‘rib chiqilib, shu kuni e’tirozi qanoatlantirilgan va fuqarolik ishlari bo‘yicha Shahrisabz tumanlararo sudining 2024-yil 7-maydagi sud buyrug‘i bekor qilingan, deyiladi viloyat sudlari axborot xizmati bergan munosabatda.
Izoh (0)