“Hududiy elektr tarmoqlari” AJ foydalanuvchilar e’tibor berishi lozim bo‘lgan ba’zi ko‘rsatmalarni eslatib o‘tdi

“Hududiy elektr tarmoqlari” AJ tomonidan HET Billing dasturiy kompleksi ishga tushirilgani haqida avval xabar berilgandi.

Shu munosabat bilan jamiyatning rasmiy saytidagi takomillashtirilgan “Shaxsiy kabinet”ga kirish va ro‘yxatdan o‘tish xususida videoqo‘llanma tayyorlanib, iste’molchilar e’tiboriga havola etilgan edi.

Kuni kecha iste’molchilarga yanada qulaylik yaratish maqsadida HET Billing dasturiy kompleksi joriy etilishi doirasida jamiyatning mobil ilovasi ham ishga tushirildi.  

So‘nggi kunlarda ko‘pchilik iste’molchilarda “Shaxsiy kabinet” hamda mobil ilovaga kirishda qiyinchiliklar bo‘layotgani to‘g‘risida xabarlar tarqaldi. Shu sababli “Hududiy elektr tarmoqlari” aksionerlik jamiyati tizimdan foydalanuvchilar e’tibor berishi lozim bo‘lgan ba’zi ko‘rsatmalarni eslatib o‘tdi.

Xususan, kabinet va ilovadan foydalanishda parol va login orqali kirayotgan iste’molchining telefon raqami, billing tizimida fuqaroning shaxsiy hisob raqami orqali ro‘yxatdan o‘tgan bo‘lishi shartligi ta’kidlandi. 

One ID orqali foydalanmoqchi bo‘lgan fuqarolar Yagona identifikatsiya tizimi ma’lumotlari billing tizimi ma’lumotlari bilan aynan bir xil bo‘lishiga e’tibor berishlari lozim. Aks holda, tizimga kirishda cheklanishlar yuzaga keladi.

“Shaxsga doir ma’lumotlar tо‘g‘risida”gi Qonunga muvofiq, iste’molchilar telefon raqamini billing tizimida hisob raqami orqali rо‘yxatdan о‘tkazish yoki almashtirish uchun shaxsan о‘zlari tuman elektr ta’minoti korxonasiga kelishlari talab etiladi”, deya qayd etgan “Hududiy elektr tarmoqlari” AJ.