Qarshi tumanida yashovchi ayol qizi tuman hokimi Zoir Aliqulovning jiyani boshqaruvidagi mashinada urib ketilganini, ayni paytda farzandi shifoxonada ahvoli og‘ir holatda ekanini aytib, videochiqish qilgandi. Ko‘p o‘tmay ayol xato ma’lumot tarqatganini ma’lum qildi. Qarshi tumani hokimligi esa ayolning videochiqishiga raddiya bildirdi.
Ijtimoiy tarmoqlarda tarqatilgan “Qarshi tumani hokimining jiyani fuqaroni urib, qochib ketdi” mazmunida e’lon qilingan xabarlar mutlaqo haqiqatga to‘g‘ri kelmaydi. Aslida joriy yil 15-avgust kuni taxminan soat 22:50 larda Mirishkor tumanida yashovchi fuqaro G‘.I. boshqaruvida bo‘lgan Gentra Qarshi—Beshkent—Kasbi—Mirishkor yo‘lidan harakatlanib kelib, Qarshi tumani joylashgan “Avto Room” avtosaloni ro‘parasida yo‘lning chap tomonidan o‘ng tomoniga piyoda harakatlanib o‘tayotgan M. A.va M. O.ni urib yuborib, yo‘l-transport hodisasi sodir etgan. Natijada M.A hamda M.O.lar tan jarohati olib shifoxonaga tushgan, deyiladi hokimlik raddiyasida.
Hokimlikning tushuntirish berishicha, urib yuborilgan qizaloqning onasi tomonidan e’lon qilingan videolavha kuchli hayajon paytida tarqatilganligi ma’lum bo‘lgan.
Tuman hokimi o‘rinbosari fuqaro bilan suhbatlashganda tuman hokimi tomonidan ko‘rsatilgan yordam fuqaro tomonidan noto‘g‘ri talqin qilinganligini, shu bois ham ijtimoiy tarmoqlarda tuman hokimi jiyani talqini berilganligi ma’lum bo‘ldi, deyiladi hokimlik raddiyasida.
Hokimlik axborot xizmati ijtimoiy tarmoq foydalanuvchilari va aholiga internetda asossiz va yolg‘on xabar tarqatish, qonun bilan javobgarlikka sabab bo‘lishini eslatmoqda.
“Daryo” jurnalisti mazkur holat yuzasidan Qarshi tumani hokimi Zoir Aliqulov bilan ham muloqot qildi.
Tuman hududida sodir bo‘lgan har qanday YTH e’tiborimdan chetda qolmaydi. Shu zahoti shifoxona yetib borib, har safar bemorlarga yordam ko‘rsatishga, imkon qadar hayotini saqlab qolishga o‘z hissamni qo‘shishga harakat qilaman. Kecha sodir bo‘lgan YTH ishtirokchilariga ham yordam berish maqsadida odatdagidek shifoxonaga borib, ko‘mak berishga uringanim boshqacha talqin qilinibdi.
Bu masalada bemor qizning onasi bilan suhbatlashib, men doimgidek o‘z ishimni qilganimni, YTH sodir etgan fuqaroning menga hech qanday aloqasi yo‘qligini aytib, tushuntirish berdim. O‘ylaymanki, ayol xatosini tushunib yetdi. Biz ham uning hayajonda farzandi uchun jon kuydirib, xato gapirib qo‘yganini kechirdik, deydi Qarshi tumani hokimi Zoir Aliqulov vaziyatga shaxsan izoh berar ekan.
Izoh (0)