Toshkent viloyatining Bo‘stonliq tumani profilaktika inspektori xotini va yoshga to‘lmagan farzandi, so‘ngra o‘zini otib o‘ldirdi.
Bosh prokuratura axborot xizmati rahbari Hayot Shamsutdinovning “Daryo”ga maʼlum qilishicha, voqea 6-avgust kuni soat 21:00 larda Bo‘stonliq tumanida profilaktika inspektori yashagan xizmat xonadonida sodir bo‘lgan.
Bo‘stonliq tumani IIB JXX XPB profilaktika inspektori (1996-yilda tug‘ilgan) turmush o‘rtog‘i (1996-yilda tug‘ilgan) bilan o‘rtalarida kelib chiqqan o‘zaro kelishmovchilik davomida o‘ziga biriktirilgan “PM tabel” quroli bilan turmush o‘rtog‘i va 2024-yilda tug‘ilgan o‘g‘liga o‘q uzib, qasddan o‘ldirgan.
Shundan so‘ng u o‘z jinoiy qilmishlaridan qutulib qolish maqsadida “PM tabel” quroli bilan boshiga bir marotaba o‘q uzib, o‘z joniga qasd qilgan.
Mazkur holat yuzasidan Bo‘stonliq tumani prokuraturasi tomonidan Jinoyat kodeksining 97-moddasi (qasddan odam o‘ldirish) bilan jinoyat ishi qo‘zg‘atilib, dastlabki tergov harakatlari olib borilmoqda.
2023-yilda Toshkentda Milliy gvardiya qo‘riqlash xodimi o‘ziga biriktirilgan qurol bilan o‘zini otib qo‘ygandi. 2022-yilda Xorazm viloyati Yangiariq tuman IIB xodimi xizmat quroli orqali o‘z joniga qasd qilgandi. Farg‘ona viloyatining Toshloq tumani profilaktika inspektori esa tabel quroli bilan o‘z boshini jarohatlagandi.
Izoh (0)