AQSH rasmiylarining fikricha, Eron va “Hizbulloh” Isroilga zarba berishga dastlab kutilganidan kechroq qaror qilgan va hujumni 8 yoki 9-avgust kuni amalga oshirishi mumkin. Bu haqda Al Arabiya telekanali AQSH razvedkasidan xabardor manbalarga tayanib xabar berdi.
Eron va “Hizbulloh”ning javobi mohiyatan noaniq bo‘lib qolsa-da, AQSH rasmiylari hujum yaqin ekanligiga ishonch bildirmoqda. Dastlabki baholashlar buni hafta boshida bashorat qilgan edi, biroq so‘nggi razvedka ma’lumotlariga ko‘ra, javob payshanba yoki juma oqshomiga qoldirilgan bo‘lishi mumkin, deyiladi xabarda.
Razvedka maʼlumotlariga ko‘ra, Eron birinchi navbatda HAMAS siyosiy byurosi rahbari Ismoil Haniyaning o‘ldirilishi munosabati bilan 7-avgust kuni Tehron chaqirgan Islom hamkorlik tashkilotining favqulodda yig‘ilishining yakunini kutadi.
Avvalroq Amerika rasmiylarining nomi oshkor etilmagan vakili telekanalga bergan intervyusida Vashington Eron va “Hizbulloh”ning javob harakatlari doirasida Suriya va Iroqdagi AQSH kuchlariga hujum qilishni kutayotganini aytgandi. Axios portali AQSH davlat kotibi Entoni Blinken G7 mamlakatlaridagi hamkasblarini 5-avgust kuni Eron va “Hizbulloh” tomonidan Isroilga hujum boshlashi mumkinligi haqida ogohlantirgani haqida xabar bergan.
O‘tgan hafta Tehronda Haniya va Bayrutda “Hizbulloh” qo‘mondoni Fuad Shukr o‘ldirilganidan keyin Yaqin Sharqdagi vaziyat yanada keskinlashdi. Eron va “Hizbulloh” Isroildan ularning o‘limi uchun qasos olishga va’da bergan.
The New York Times o‘z manbalariga tayanib, Eron oliy rahnamosi Oyatulloh Ali Xomanaiy Haniyaning o‘ldirilishiga javoban Isroilga to‘g‘ridan to‘g‘ri hujum qilishga buyruq bergani haqida xabar bergan.
Izoh (0)