Bangladeshda mamlakat bosh vaziri Shayx Hasina isteʼfoga chiqishi ortidan Nobel mukofoti laureati Muhammad Yunus ishtirokida muvaqqat hukumat tuziladi. Bu haqda BBC nashri Dakkadagi manbalarga asoslanib, xabar berdi.
Manbada aytilishicha, Muhammad Yunus allaqachon vaqtinchalik hukumat raisi etib tayinlangan. Endilikda qilinishi kerak bo‘lgan yagona vazifa esa hukumat tarkibini tuzib chiqish. Mamlakat aholisi erkin fikrli va xalqparvar Muhammad Yunusga ishonch bildirgan.
Muhammad Yunus g‘alayonlar oqibatida hokimiyatdan ketishga majbur bo‘lgan Shayx Hasinaning azaliy raqibi bo‘lgan. Ikki siyosiy qarash va tushuncha tarafdorlari bo‘lgan raqiblar uzoq muddat hokimiyat uchun daʼvo qilib kelgan.
Muvaqqat davlat rahbari hozirda 84 yoshda. U mikrokredit berish tizimini keng yoyish orqali davlat va jamiyat uchun manfaatli bo‘ladigan kelishuvlar tuzishga imkon beradigan dastur ishlab chiqqan. Sobiq bosh vazir Shayx Hasina esa bu tizimni samarasiz, Muhammad Yunusni esa “xalq dushmani” deb atagan.
Professor Muhammad Yunusni muvaqqat hukumatning rahbari etib tayinlash to‘g‘risidagi qaror Bangladesh prezidenti Muhammad Shahobiddin, harbiy rahbarlar va talabalar yetakchilari o‘rtasidagi uchrashuvdan so‘ng qabul qilingan. Iqtisod va moliya tizimini yaxshi tushunuvchi, keksa bo‘lsa-da, aholi va xalqaro hamjamiyat oldida katta obro‘ga ega bo‘lgan shaxs mamlakatdagi norozilik to‘lqinlarini to‘xtatishda muhim rol o‘ynashi mumkinligi aytilgan.
Muhammad Yunus hozirda Parijdan Dakkaga qaytayotgani maʼlum qilingan. U avvaliga tibbiy muolajadan o‘tadi va so‘ngra omma oldida ko‘rinish beradi.
Maʼlumot o‘rnida, professor Muhammad Yunus 1940-yil 28-iyunda tug‘ilgan. U ijtimoiy tadbirkor, bankir, iqtisodchi va fuqarolik jamiyati yetakchisi sifatida tanilgan. Grameen bankiga asos solgani hamda mikrokredit va mikromoliya tushunchalarini yaratgani uchun tinchlik yo‘nalishida Nobel mukofoti bilan taqdirlangan. U ishlab chiqqan tizimda mablag‘lar anʼanaviy bank kreditlarini olish uchun aholining o‘ta kambag‘al qatlamlariga beriladi va qashshoqlikka qarshi kurashda muhim ahamiyat kasb etadi.
Izoh (0)