AQSH hukumati ocharchilik changalida qolgan Kongo Demokratik Respublikasi aholisi uchun 414 million dollar hajmidagi gumanitar yordam paketi ajratadi. Bu haqda BMT Gumanitar yordam markazi tarqatgan xabarga asoslanib, Al Arabiya nashri xabar berdi.
Manbada aytilishicha, bugungi kunda KDR hududida 25 milliondan ortiq fuqaro ocharchilik sharoitida yashamoqda. Bu esa mamlakat aholisining qariyb to‘rtdan biri degani.
Mamlakatning sharqiy qismlarida yuz bergan isyonchilik harakatlari hamda Ruanda bilan chegara hududida yuz bergan to‘qnashuvlar oqibatida millionlab fuqarolar qochoqqa aylangan. Tinch aholi dehqonchilik hududlari va turar joylarini tashlab ketishi oqibatida ocharchilik muammosi keskinlashgan.
AQSHning BMT oziq-ovqat va qishloq xo‘jaligi agentligidagi elchisi Jeffri Preskottning aytishicha, ajratiladigan gumanitar yordamning katta qismi Birlashgan Millatlar Tashkiloti agentliklari, shoshilinch oziq-ovqat yordami dasturi, sog‘liqni saqlash va ovqatlanish, boshpana, suv, sanitariya va gigiyena bo‘yicha yordam ko‘rsatadigan guruhlarga yo‘naltiriladi. Mablag‘lar faqatgina och aholini taʼminlash uchun emas, balki ijtimoiy inqirozni kuchaytirayotgan sabablarni bartaraf qilish uchun ham sarflanadi.
Manbada aytilishicha, o‘tgan yilning oktyabr oyidan beri AQSH hukumati Kongo Demokratik Respublikasi uchun ajratgan mablag‘lar jami 838 million dollarni tashkil etgan. Ijtimoiy yordam agentliklarining saʼy-harakatlariga qaramay, ulkan sonli och aholi yordam mablag‘larini yutib yubormoqda. Ijtimoiy inqiroz esa tobora kuchaymoqda.
Kongo armiyasi 2022-yildan beri M23 isyonchilariga qarshi kurashib kelmoqda. Mamlakat sharqida kechgan janglar oqibatida so‘nggi 6 oyda 1,7 milliondan ortiq odam o‘z uylarini tashlab ketgan. Ko‘plab mojarolar tufayli ko‘chirilgan kongoliklarning umumiy soni esa rekord darajadagi 7,2 millionga nafarga yetgan.
Birlashgan Millatlar Tashkiloti 2024-yilda dunyo mamlakatlarini KDR uchun umumiy 2,6 milliard dollar ajratishga chaqirgan. Ijtimoiy muammolar kuchayib borayotgani, mamlakatda bir milliondan ortiq bolalar to‘yib ovqatlanmaslik oqibatida kasalliklarga duchor bo‘lish xavfi ostida ekani ogohlantirilgan.
Kongo Demokratik Respublikasi sharqida hozirda maymunchechak epidemiyasi davom etayotgani xabar berilgan. Ushbu kasallik bilan og‘riganlar soni 27 ming nafardan oshgan. Halok bo‘lgan fuqarolar soni esa 1100 nafarga yetgan. AQSH ushbu epidemiyaga qarshi kurash doirasida poytaxt Kinshasadagi tibbiyot muassasalariga 50 ming quti vaksina ajratgan.
Izoh (0)