Ukraina prezidenti Vladimir Zelenskiy hukumatga kreditorlar bilan restrukturizatsiya borasida kelishuvga erishish uchun tashqi qarz bo‘yicha to‘lovlarni 1-oktyabrgacha to‘xtatib turish huquqini beruvchi qonunni imzoladi, deya xabar berdi Oliy Rada saytidagi ma’lumotlar bazasi.
Ukraina Moliya vazirligi maʼlumotlariga ko‘ra, iyun oyi oxirida mamlakatning davlat qarzi 152,16 milliard dollarni tashkil qilgan.
Qonun tashqi qarzlar bo‘yicha to‘lovlarga moratoriy joriy etish huquqidan tashqari, hukumatga avtomobil yo‘llari davlat agentligining qarzlarini qayta tuzishga ham ruxsat beradi. Ukrainaning Suspilne nashri aniqlik kiritishicha, gap 2021-yil uchun umumiy summasi 700 million dollar bo‘lgan yevroobligatsiyalar seriyasi haqida bormoqda.
Harbiy harakatlar boshlanganidan keyin xususiy kreditorlar Ukrainaga davlat qarzi bo‘yicha to‘lovlarni to‘xtatishga ruxsat berdi. Muzlatish muddati 1-avgustda tugaydi.
Iyul oyida Ukraina bosh vaziri Denis Shmigal bir guruh obligatsiyalar egalari bilan qariyb 20 milliard dollarlik qarzni qayta tuzish bo‘yicha kelishuvga erishganini e’lon qildi.
Kuni kecha Fitch xalqaro reyting agentligi Ukrainaning uzoq muddatli emitent defolt reytingini “CC”dan (defoltning yuqori ehtimoli) “C” darajaga (defolt muqarrar) tushirgan edi.
Izoh (0)