Fransiyaning Parij shahrida yozgi Olimpiada o‘yinlari davom etadi. Bugun, 29-iyul kuni dzyudo sport turi bo‘yicha ayollar o‘rtasida ikkinchi bosqich bahslari bo‘lib o‘tdi.
Shukurjon Aminova gruziyalik Eteri Liparteliani bilan bellashdi. Afsuski, murosasiz kechgan bahsda o‘zbekiston vakilasi mag‘lubiyatga uchradi va Parij Olimpiadasidagi o‘z ishtirokini yakunladi.
Avvalroq Kot d’Ivuar vakili Dabonnega qarshi uchrashuvda o‘zbekiston sportchisi g‘alaba qozongan edi.
Ma’lumot uchun, Aminova Shukurjon Fayzullo qizi 2002-yil 16-noyabr kuni Xorazm viloyati Qo‘shko‘pir tumanida tavallud topgan. 2017-yildan xalqaro musobaqalarda yurtimiz sharafini himoya qilmoqda. Murabbiyi Sardor Niyozmetov. Aminova Gran-pri musobaqalarida 1 ta oltin, turli yosh toifalaridagi Osiyo chempionatlarida 2 ta oltin va 1 ta bronza, Xanchjou-2022 yozgi Osiyo o‘yinlarida 1 ta kumush medalga sazovor bo‘lgan. 2021-yilgi jahon chempionatida aralash jamoaviy dasturda bronza medali bilan taqdirlangan.
Aminova Xalqaro dzyudo federatsiyasining yo‘llanmalarni qayta taqsimlash dasturiga ko‘ra -57 kg vazn toifasida Parij-2024 yozgi Olimpiya o‘yinlari yo‘llanmasini qo‘lga kiritgan.
Izoh (0)