Франциянинг Париж шаҳрида ёзги Олимпиада ўйинлари давом этади. Бугун, 29 июль куни дзюдо спорт тури бўйича аёллар ўртасида иккинчи босқич баҳслари бўлиб ўтди.
Шукуржон Аминова грузиялик Eterи Липартелиани билан беллашди. Афсуски, муросасиз кечган баҳсда ўзбекистон вакиласи мағлубиятга учради ва Париж Олимпиадасидаги ўз иштирокини якунлади.
Аввалроқ Кот дъИвуар вакили Дабоннега қарши учрашувда ўзбекистон спортчиси ғалаба қозонган эди.
Маълумот учун, Аминова Шукуржон Файзулло қизи 2002 йил 16 ноябрь куни Хоразм вилояти Қўшкўпир туманида таваллуд топган. 2017 йилдан халқаро мусобақаларда юртимиз шарафини ҳимоя қилмоқда. Мураббийи Сардор Ниёзметов. Аминова Гран-при мусобақаларида 1 та олтин, турли ёш тоифаларидаги Осиё чемпионатларида 2 та олтин ва 1 та бронза, Ханчжоу-2022 ёзги Осиё ўйинларида 1 та кумуш медалга сазовор бўлган. 2021 йилги жаҳон чемпионатида аралаш жамоавий дастурда бронза медали билан тақдирланган.
Аминова Халқаро дзюдо федерациясининг йўлланмаларни қайта тақсимлаш дастурига кўра -57 кг вазн тоифасида Париж-2024 ёзги Олимпия ўйинлари йўлланмасини қўлга киритган.
Изоҳ (0)