Madaniyat va sport mutaxassisliklarida magistraturaga hujjat topshiruvchi talabalarga yengillik yaratilgan holda qabulda B2 sertifikati bekor qilinib, B1 daraja yetarli deb topildi. Bu haqda oliy ta’lim muassasalariga o‘qishga qabul qilish to‘g‘risida prezident farmoni ishlab chiqildi. Biroq mas’ullar turk tili sertifikati bo‘yicha B1 daraja yo‘qligini ta’kidlamoqda.
Barchaga ma’lumki, magistratura mutaxassisliklariga tanlovlarda belgilangan talab darajasidagi milliy yoki xalqaro sertifikatga ega shaxslar ishtirok etishi mumkin.
Joriy yilning may oyi boshida madaniyat va sport yo‘nalishida tahsil olayotgan talabalar uchun magistraturaga qabulda til bilish sertifikati bekor qilinganligi haqida ommaviy axborot vositalarida О‘zbekiston Respublikasi oliy ta’lim fan va innovatsiya vaziri tomonidan ma’lumot berildi. Ammo xursandchilik ko‘pga cho‘zilmadi, oradan bir kun o‘tgach vazir noto‘g‘ri bayonot bergani haqida xabar berildi.
Oradan ko‘p vaqt o‘tmay, О‘zbekiston Respublikasi prezidentining 2024-yil 24-maydagi “Oliy ta’lim tashkilotlariga о‘qishga qabul qilish va davlat buyurtmasini joylashtirish tizimini takomillashtirish tо‘g‘risida”gi farmoni 4-bandida magistratura mutaxassisliklari va oliy ta’limdan keyingi ta’lim ixtisosliklariga qabul qilishda madaniyat va sport mutaxassisliklari (ixtisosliklari) bo‘yicha kamida B1 darajasida xorijiy tilni bilish belgilandi.
“Daryo.uz” saytiga bir qator talabalar tomonidan kelib tushgan murojaatga ko‘ra, ular may-iyun oyida turk tilidan milliy sertifikat uchun imtihon topshirgan va natijalar chiqa boshlagach shaxsiy kabinetida B2 daraja uchun yetarlicha ball to‘play olmagani haqida ma’lumot berilgan. Holbuki, bir talabgor 63.31 ball, boshqasi esa 51.31 ball to‘plagan. O‘zbekiston Bilim va malakalarni baholash agentligi (BBA) baholash mezonida 51-64 gacha B2 daraja uchun yetarli deb ko‘rsatilgan.
Bilimni baholash agentligi bilan bog‘lanib, sababi so‘ralganda bu baholash mezoni ingliz tiliga taalluqli ekanligi, turk tilida 72 balldan boshlab B2 daraja berilishi va B1 daraja yo‘qligi aytilgan. Chet tilini bilish darajasini baholash mezoni deb atalgan tizimda aynan ingliz yoki turk tili uchun tegishli deyilmagan. Bundan kelib chiqadiki, rasmiy saytda to‘liq ma’lumot berilmaganmi?
Imtihonga ro‘yxatdan o‘tish jarayonida turk tilidan faqat B2 va C1 daraja tanlanishi mumkin. Bunda agar talabgor B2 darajani tanlagan bo‘lsa-yu, to‘plagan bali C1 daraja uchun yetarli bo‘lsa ham unga B2 sertifikati beriladi — sababi avvaldan B2 daraja tanlab bo‘linganida. Ammo turk tili imtihonida B2 darajaga bali yetmagan talabgorlarga B1 daraja berilmaydi — sababi B1 daraja mavjud emas.
Ammo magistratura qabulida madaniyat va sport mutaxassisliklari uchun B1 daraja belgilanishi to‘g‘risidagi farmonga muvofiq, ushbu yo‘nalishlarga hujjat topshirayotgan va B2 darajaga bali yetmagan talabgorlarga B1 sertifikati berilishi kerak emasmi? Axir qabul tugashiga juda oz muddat qoldi-ku. Magistraturaga qabulda O‘zbekiston davlat xoreografiya akademiyasi San’atshunoslik yo‘nalishi bo‘yicha bu yil ham hali birorta ariza kelib tushmagan. Yana o‘tgan yilgidek hol takrorlanadimi?
Ma’lumot o‘rnida, 2023/2024-o‘quv yilida O‘zbekiston davlat xoreografiya akademiyasida San’at nazariyasi va tarixi yo‘nalishi bo‘yicha magistraturaga hujjat topshiruvchilarda B2 darajadagi til bilish sertifikati yo‘qligi sababli ajratilgan kvota bo‘sh qolgan.
Kuni kecha Bilimni baholash agentligi bilan bog‘lanib, vaziyatga yetarlicha oydinlik kiritish so‘ralganda bu masalaga agentlikning Chet tillari bo‘limi javob berishi aytildi. Biroq suhbat davomida bo‘lim mas’ullari bilan bog‘lanish imkoni bo‘lmadi va shu bo‘lim raqami berilib, shaxsan bog‘lanishga urinib ko‘rish aytildi va ogohlantirildi — bo‘lim go‘shakka javob berishi qiyin, tinmay qo‘ng‘iroq qilish kerak, shundagina qo‘ng‘iroqqa javob berish ehtimoli bo‘ladi.
Eng ajablanarlisi, agentlik tomonidan Chet tillari bo‘limi deya berilgan raqamga qo‘ng‘iroq qilinishi bilan keksa ayoldan “Bu test markazi emas, xonadon” degan javobni eshitdik. Bundan kelib chiqadiki, mazkur bo‘lim bilan bog‘lanmoqchi bo‘lganlarga noto‘g‘ri raqam beriladimi?
Yana biz bilan suhbatlashgan xodim bilan bog‘lanib, to‘g‘ri raqam olindi. Ammo ogohlantirilganidek, mana ikki kundirki, bo‘lim go‘shakni ko‘tarmadi. Murojaatchilarning talabini qondirish yuzasidan Bilimni baholash agentligi tomonidan munosabat berish so‘raladi.
Izoh (0)