Маданият ва спорт мутахассисликларида магистратурага ҳужжат топширувчи талабаларга енгиллик яратилган ҳолда қабулда B2 сертификати бекор қилиниб, B1 даража етарли деб топилди. Бу ҳақда олий таълим муассасаларига ўқишга қабул қилиш тўғрисида президент фармони ишлаб чиқилди. Бироқ масъуллар турк тили сертификати бўйича B1 даража йўқлигини таъкидламоқда.
Барчага маълумки, магистратура мутахассисликларига танловларда белгиланган талаб даражасидаги миллий ёки халқаро сертификатга эга шахслар иштирок этиши мумкин.
Жорий йилнинг май ойи бошида маданият ва спорт йўналишида таҳсил олаётган талабалар учун магистратурага қабулда тил билиш сертификати бекор қилинганлиги ҳақида оммавий ахборот воситаларида Ўзбекистон Республикаси олий таълим фан ва инновация вазири томонидан маълумот берилди. Аммо хурсандчилик кўпга чўзилмади, орадан бир кун ўтгач вазир нотўғри баёнот бергани ҳақида хабар берилди.
Орадан кўп вақт ўтмай, Ўзбекистон Республикаси президентининг 2024 йил 24 майдаги “Олий таълим ташкилотларига ўқишга қабул қилиш ва давлат буюртмасини жойлаштириш тизимини такомиллаштириш тўғрисида”ги фармони 4-бандида магистратура мутахассисликлари ва олий таълимдан кейинги таълим ихтисосликларига қабул қилишда маданият ва спорт мутахассисликлари (ихтисосликлари) бўйича камида B1 даражасида хорижий тилни билиш белгиланди.
“Daryo.uz” сайтига бир қатор талабалар томонидан келиб тушган мурожаатга кўра, улар май июнь ойида турк тилидан миллий сертификат учун имтиҳон топширган ва натижалар чиқа бошлагач шахсий кабинетида B2 даража учун етарлича балл тўплай олмагани ҳақида маълумот берилган. Ҳолбуки, бир талабгор 63.31 балл, бошқаси эса 51.31 балл тўплаган. Ўзбекистон Билим ва малакаларни баҳолаш агентлиги (ББА) баҳолаш мезонида 51-64 гача B2 даража учун етарли деб кўрсатилган.
Билимни баҳолаш агентлиги билан боғланиб, сабаби сўралганда бу баҳолаш мезони инглиз тилига тааллуқли эканлиги, турк тилида 72 баллдан бошлаб B2 даража берилиши ва B1 даража йўқлиги айтилган. Чет тилини билиш даражасини баҳолаш мезони деб аталган тизимда айнан инглиз ёки турк тили учун тегишли дейилмаган. Бундан келиб чиқадики, расмий сайтда тўлиқ маълумот берилмаганми?
Имтиҳонга рўйхатдан ўтиш жараёнида турк тилидан фақат B2 ва C1 даража танланиши мумкин. Бунда агар талабгор B2 даражани танлаган бўлса-ю, тўплаган бали C1 даража учун етарли бўлса ҳам унга B2 сертификати берилади — сабаби аввалдан B2 даража танлаб бўлинганида. Аммо турк тили имтиҳонида B2 даражага бали етмаган талабгорларга B1 даража берилмайди — сабаби B1 даража мавжуд эмас.
Аммо магистратура қабулида маданият ва спорт мутахассисликлари учун B1 даража белгиланиши тўғрисидаги фармонга мувофиқ, ушбу йўналишларга ҳужжат топшираётган ва B2 даражага бали етмаган талабгорларга B1 сертификати берилиши керак эмасми? Ахир қабул тугашига жуда оз муддат қолди-ку. Магистратурага қабулда Ўзбекистон давлат хореография академияси Санъатшунослик йўналиши бўйича бу йил ҳам ҳали бирорта ариза келиб тушмаган. Яна ўтган йилгидек ҳол такрорланадими?
Маълумот ўрнида, 2023/2024-ўқув йилида Ўзбекистон давлат хореография академиясида Санъат назарияси ва тарихи йўналиши бўйича магистратурага ҳужжат топширувчиларда B2 даражадаги тил билиш сертификати йўқлиги сабабли ажратилган квота бўш қолган.
Куни кеча Билимни баҳолаш агентлиги билан боғланиб, вазиятга етарлича ойдинлик киритиш сўралганда бу масалага агентликнинг Чет тиллари бўлими жавоб бериши айтилди. Бироқ суҳбат давомида бўлим масъуллари билан боғланиш имкони бўлмади ва шу бўлим рақами берилиб, шахсан боғланишга уриниб кўриш айтилди ва огоҳлантирилди — бўлим гўшакка жавоб бериши қийин, тинмай қўнғироқ қилиш керак, шундагина қўнғироққа жавоб бериш эҳтимоли бўлади.
Энг ажабланарлиси, агентлик томонидан Чет тиллари бўлими дея берилган рақамга қўнғироқ қилиниши билан кекса аёлдан “Бу тест маркази эмас, хонадон” деган жавобни эшитдик. Бундан келиб чиқадики, мазкур бўлим билан боғланмоқчи бўлганларга нотўғри рақам бериладими?
Яна биз билан суҳбатлашган ходим билан боғланиб, тўғри рақам олинди. Аммо огоҳлантирилганидек, мана икки кундирки, бўлим гўшакни кўтармади. Мурожаатчиларнинг талабини қондириш юзасидан Билимни баҳолаш агентлиги томонидан муносабат бериш сўралади.
Изоҳ (0)