O‘zbekistonda birinchi yarim yillikda litsenziyasiz faoliyat yuritgan 65 nafar sanʼatkorlarga chora ko‘rildi. Bu haqda “O‘zbekkonsert” davlat muassasasi axborot xizmati xabar berdi.
Maʼlum qilinishicha, bugungi kunda ijtimoiy tarmoqlar orqali “maʼlum bir auditoriyagina taniydigan yoki bo‘lmasa litsenziyaga ega bo‘lmagan ijodkorlar” turli ko‘rsatuv va eshittirishlarga mehmon sifatida chaqirilmoqda.
Vaholanki, har qanday sanʼatkor o‘z ijodini taqdim qilishda, ommaviy axborot vositalarida qo‘shiqlar va videokliplarni aholiga yetkazish uchun litsenziya talab etiladi. To‘y marosimlari, oilaviy bazmlar, barlar va restoranlardagi yig‘inlarda ham litsenziyasiz faoliyat ko‘rsatish holatlari ko‘paymoqda.
Shu o‘rinda, “O‘zbekkonsert” davlat muassasasi bunday faoliyat noqonuniy ekanligini taʼkidlab, ommaviy axborot vositalari xodimlari hamda xalqimizdan xizmatga taklif etilayotgan boshlovchilar, sanʼatkorlarning litsenziyasi bor yoki yo‘qligini aniqlashtirishga, litsenziyasiz ijodkorlarning xizmatidan foydalanmaslikka chaqirib qoladi, deyiladi xabarda.
“O‘zbekkonsert”ga ko‘ra, litsenziya — jismoniy yoki yuridik shaxsga beriladigan, litsenziya talablari va shartlariga majburiy ravishda rioya etilgan taqdirda faoliyatning litsenziyalanadigan turini yoki uning kichik turini amalga oshirish huquqini beruvchi hujjat.
“Eslatib o‘tamiz, Maʼmuriy javobgarlik to‘g‘risidagi kodeksning 165-moddasiga ko‘ra litsenziyalanishi lozim bo‘lgan faoliyat bilan litsenziyasiz shug‘ullanish fuqarolarga bazaviy hisoblash miqdorining o‘n besh baravaridan yigirma baravarigacha, mansabdor shaxslarga esa yigirma baravaridan yigirma besh baravarigacha miqdorda jarima solishga sabab bo‘ladi”, deya qo‘shimcha qilinadi xabarda.
Izoh (0)