Ўзбекистонда биринчи ярим йилликда лицензиясиз фаолият юритган 65 нафар санъаткорларга чора кўрилди. Бу ҳақда “Ўзбекконцерт” давлат муассасаси ахборот хизмати хабар берди.
Маълум қилинишича, бугунги кунда ижтимоий тармоқлар орқали “маълум бир аудиториягина танийдиган ёки бўлмаса лицензияга эга бўлмаган ижодкорлар” турли кўрсатув ва эшиттиришларга меҳмон сифатида чақирилмоқда.
Ваҳоланки, ҳар қандай санъаткор ўз ижодини тақдим қилишда, оммавий ахборот воситаларида қўшиқлар ва видеоклипларни аҳолига етказиш учун лицензия талаб этилади. Тўй маросимлари, оилавий базмлар, барлар ва ресторанлардаги йиғинларда ҳам лицензиясиз фаолият кўрсатиш ҳолатлари кўпаймоқда.
Шу ўринда, “Ўзбекконцерт” давлат муассасаси бундай фаолият ноқонуний эканлигини таъкидлаб, оммавий ахборот воситалари ходимлари ҳамда халқимиздан хизматга таклиф этилаётган бошловчилар, санъаткорларнинг лицензияси бор ёки йўқлигини аниқлаштиришга, лицензиясиз ижодкорларнинг хизматидан фойдаланмасликка чақириб қолади, дейилади хабарда.
“Ўзбекконцерт”га кўра, лицензия — жисмоний ёки юридик шахсга бериладиган, лицензия талаблари ва шартларига мажбурий равишда риоя этилган тақдирда фаолиятнинг лицензияланадиган турини ёки унинг кичик турини амалга ошириш ҳуқуқини берувчи ҳужжат.
“Эслатиб ўтамиз, Маъмурий жавобгарлик тўғрисидаги кодекснинг 165-моддасига кўра лицензияланиши лозим бўлган фаолият билан лицензиясиз шуғулланиш фуқароларга базавий ҳисоблаш миқдорининг ўн беш бараваридан йигирма бараваригача, мансабдор шахсларга эса йигирма бараваридан йигирма беш бараваригача миқдорда жарима солишга сабаб бўлади”, дея қўшимча қилинади хабарда.
Изоҳ (0)