Xitoy hukumati AQSH bilan yadroviy qurollar nazorati borasidagi kelishuvlarni to‘xtatgan. Bu haqda Xitoy Tashqi ishlar vazirligi bayonotiga asoslanib, Reuters manbasi xabar berdi.
Manbada aytilishicha, Xitoy va AQSH o‘rtasidagi yangi keskinlik Tayvan masalasida yuzaga kelgan. Vashington Tayvanga qurol yuborishni to‘xtatmaganligi kelishuvlarni muzlatishga sabab sifatida ko‘rsatilgan.
Tahlilchilarga ko‘ra, Xitoyning so‘nggi qarori global qurol-aslaha nazorati bo‘yicha saʼy-harakatlarga jiddiy zarba beradi. Pekin ushbu voqealar ortidan Vashington bilan yadroviy qurol poygasini cheklash choralarini muhokama qilishdan bosh tortgan boshqa bir xalqaro o‘yinchi — Moskvaga qo‘shilishi mumkin.
“So‘nggi oylarda Tayvanga qurol yetkazib berilishi qurol nazorati bo‘yicha maslahatlashuvlarni davom ettirish uchun zarur bo‘lgan siyosiy muhitni jiddiy ravishda buzdi.
Xitoy tomoni AQSH bilan qurollarni nazorat qilish va tarqatmaslik bo‘yicha maslahatlashuvlarning yangi raundi bo‘yicha muhokamani to‘xtatishga qaror qildi. Masʼuliyat to‘liq AQSH zimmasiga tushadi”, degan Xitoy Tashqi ishlar vazirligi matbuot kotibi Lin Szyan.
Xitoy vakili Pekin xalqaro qurol nazorati bo‘yicha aloqani davom ettirishga tayyorligini aytgan. Ammo buning uchun AQSH Xitoyning asosiy manfaatlarini hurmat qilishi va muloqot va almashinuv uchun zarur shart-sharoitlarni yaratishi kerak.
AQSH rasmiylari Xitoy qaroridan jiddiy xavotirga tushgan. 500 dan ortiq yadro kallaklariga ega mamlakatning xalqaro kelishuvlardan chiqishi global tahdidni kuchaytirishi aytilgan.
Izoh (0)