Хитой ҳукумати АҚШ билан ядровий қуроллар назорати борасидаги келишувларни тўхтатган. Бу ҳақда Хитой Ташқи ишлар вазирлиги баёнотига асосланиб, Reuters манбаси хабар берди.
Манбада айтилишича, Хитой ва АҚШ ўртасидаги янги кескинлик Тайван масаласида юзага келган. Вашингтон Тайванга қурол юборишни тўхтатмаганлиги келишувларни музлатишга сабаб сифатида кўрсатилган.
Таҳлилчиларга кўра, Хитойнинг сўнгги қарори глобал қурол-аслаҳа назорати бўйича саъй-ҳаракатларга жиддий зарба беради. Пекин ушбу воқеалар ортидан Вашингтон билан ядровий қурол пойгасини чеклаш чораларини муҳокама қилишдан бош тортган бошқа бир халқаро ўйинчи — Москвага қўшилиши мумкин.
“Сўнгги ойларда Тайванга қурол етказиб берилиши қурол назорати бўйича маслаҳатлашувларни давом эттириш учун зарур бўлган сиёсий муҳитни жиддий равишда бузди.
Хитой томони АҚШ билан қуролларни назорат қилиш ва тарқатмаслик бўйича маслаҳатлашувларнинг янги раунди бўйича муҳокамани тўхтатишга қарор қилди. Масъулият тўлиқ АҚШ зиммасига тушади”, деган Хитой Ташқи ишлар вазирлиги матбуот котиби Лин Сзян.
Хитой вакили Пекин халқаро қурол назорати бўйича алоқани давом эттиришга тайёрлигини айтган. Аммо бунинг учун АҚШ Хитойнинг асосий манфаатларини ҳурмат қилиши ва мулоқот ва алмашинув учун зарур шарт-шароитларни яратиши керак.
АҚШ расмийлари Хитой қароридан жиддий хавотирга тушган. 500 дан ортиқ ядро каллакларига эга мамлакатнинг халқаро келишувлардан чиқиши глобал таҳдидни кучайтириши айтилган.
Изоҳ (0)